VOV4.K’ho- Di dơ̆ tơngkah kir sơn rai 81 nam ngai bơhiàn Cau dờng sơnam Việt Nam (06/06), Củ tịc lơgar ồng Nguyễn Xuân Phúc neh tus còp, pà phan broă lơh cau dờng sơnam lơh sa jak tàm Hợp ták xã Tân Minh Đức, xã Phạm Trấn, kơnhoàl Gia Lộc, càr Hải Dương; còp, pà phan ala mat cau dờng sơnam tàm càr Hải Dương.

Còp mờ pà phan ai ală làng bol, cau lơh broă tàm Hợp ták xã do in, Củ tịc lơgar ồng Nguyễn Xuân Phúc tơngŏ bơta chờ hờp sền gŏ cồng nha bơh Hợp ták xã Tân Minh Đức- dùl anih lơh sa kă bro geh ală cau đơng lam bồ là cau dờng sơnam lơh sa jak. Ngan là, Củ tịc lơgar jờng rơ uă Hợp ták xã neh ngui broă lơh lơh sa mờ atbồ geh cồng nha, lơh geh priă cồng 1 tơmàn 700 tơlak đong dùl lồ, gơ hòi gơ jà uă cau tàm Hợp ták xã tus bal. Pơn jat hơ̆, Củ tịc lơgar neh tus còp, pơndờm pơnđiang, pà phan ai Mpồl ala mat Cau dờng sơnam mờ 15 nă cau dờng sơnam pơn rơ jak càr Hải Dương in.

Cau mblàng K’Hạnh