VOV4.K’ho- Pơn jăt tai dơ̆ lơh broă mờ ală ƀộ, ngàñ ai jơnau đơs tă pơgồp jơnau đơs lơh sir gơs Rơcăng cih Rơndăp broă lơh “Broă lơh bơ̆t bơtàu mờ lơh sir gơs Dà lơgar gơnoar adat boh lam Xã hội Củ nghĩa Việt Nam tus nam 2030, gùng dà tus nam 2045”, ngai 07/07, Củ tịc lơgar ồng Nguyễn Xuân Phúc đơng lam dơ̆ lơh broă mờ Đảng ủy Kwang àng kâp Dà lơgar, Mpồl đơng lam Đảng Ƀộ Tư pháp. Tàm ală dơ̆ lơh broă, ală jơnau đơs tă pơgồp, cribơyai sền swì Mpồl đơng lam neh sồr cih Jơnau rơcăng cih Rơndăp broă lơh jơh nùs jơh tồr, niam, geh jăt cơng tàng tàm sră pơ àr mờ tàm bơta geh ngan, mơkung tă pơgồp bàr pe jơnau đơs bè mpồl kwang bàng mờ broă lơh bơh gah Kwang àng, gah Sền gàr adat boh lam dê.

Tàm hơ̆, uă jơnau đơs neh đơs tus bè tam gơl pa bè mpồl kwang bàng mờ broă lơh bơh anih lơh broă lùp khàu dê, ală anih lơh broă lơh jăt kơrnoăt lơh glài bơh anih cah rña dê dipal mờ bơta geh ngan tàm lơgar Việt Nam, lơh niam, sền gàr gơnoar kòn bơnus tàm ală broă lơh bơ̆t bơtàu dà lơgar, mŭt gơrờm bal mờ dunia. Đơs sồr lơh tàm dơ̆ lơh broă, gơwèt mờ bàr pe broă tơlik lơh tàm Rơndăp broă lơh geh gơrềng tus gah Kwang àng, gah Sền gàr adat boh lam mờ uă anih lơh broă ndai, Củ tịc lơgar sồr Duh broă sùm Mpồl đơng lam geh pơn jăt tai iăt kơno jơnau đơs tă pơgồp tàm ală dơ̆ lơh broă, bơh hơ̆ tơrgùm nàng yal mờ Mpồl đơng lam in sền swì rwah gùng dà lơh broă dipal.

Cau mblàng Lơ Mu K’Yến