Dờp jơnau jà bơh Củ tịc lơgar Việt Nam ồng Võ Văn Thưởng dê, Kwang ala măt lơgar Australia ồng David Hurley mờ pơ ùr còp lơgar Việt Nam kâp dà lơgar bơh ngai 03- 06/04 do. Drim do 04/04, tàm Hìu duh broă Củ tịc, Củ tịc lơgar Việt Nam ồng Võ Văn Thưởng bal mờ pơ ùr đơng lam dơ̆ wă rò yŭ rơyùm Kwang ala măt lơgar Australia ồng David Hurley mờ pơ ùr ồng dê.

Tơnơ̆ dơ̆ wă rò, Củ tịc lơgar Việt Nam ồng Võ Văn Thưởng mờ Kwang ala măt lơgar Australia ồng David Hurley bơyai lơh pơrjum, sền swì ală cồng nha lơh geh mờ ai tơlik gùng dà broă lơh chồl tơnguh lơh broă đah bàr lơgar tàm tơngai tus. Việt Nam mờ Australia lơh bơta gĭt gơ̆p cribơyai broă mờ lơgar ndai bơh nam 1973, tơnguh tus Tam klăc lơh broă bal Tơl làm tàm nam 2009, Tam klăc lơh broă bal Tơl làm tơnguh tai tàm nam 2015 mờ tơnguh tus Tam klăc lơh broă bal Jŏ jòng tàm nhai 03 nam 2018. Australia là dùl tàm ală lơgar tam klăc lơh broă bal 2 gah ai priă ODA ờ tơm wơl uă ngan rlau jơh ai lơgar Việt Nam in. 50 nam do, Australia neh dong kờl ODA lơgar Việt Nam in kờp jơh là 3 tơmàn dolar Australia, ndrờm mờ 47 rbô tơmàn đong priă lơgar Việt Nam dê. Tŭ do, geh pơgăp 31 rbô nă cau bơsram dờng mờ cau kơlôi sơnơng bơsram broă lơh lơgar Việt Nam dê gam bơsram tàm lơgar Australia (90% jăt bơta tă is priă jền).