VOV4.K’ho- Mho ngai 18/04, tàm Hìu duh broă Đảng Dà lơgar, neh geh lơh pơrjum dơ̆ bàr bơh Mpồl đơng lam Rơndăp broă lơh jŏ jòng bơ̆t bơtàu Dà lơgar gơnoar kơrnoăt boh lam bơh bơta đơng lam bơh Ủy viên Ƀộ Cíñ trị, Củ tịc lơgar ồng Nguyễn Xuân Phúc, Kwang ătbồ Mpồl đơng lam Rơndăp broă lơh dê.

Đơs tàm dơ̆ pơrjum, ala măt Mpồl đơng lam, Củ tịc lơgar ồng Nguyễn Xuân Phúc pà gĭt, ală kwang bàng tàm Mpồl sền swì jơnau, ală cau jak chài gah broă lơh do, ală cau kơlôi sơnơng jak chài neh lơh broă jơh nùs, geh kơnòl, tàm lùp, tàm cribơyai dùl bă khăt gơboh; tơrgùm dùl bơnah sră nggal uă ngan bơh 27 tơngume, 3 pang sră cih jơnau tă pơgồp jơnau đơs kwơmàng cribơyai dà lơgar; tơrgùm uă ngan bơta gĭt wă, mờng chài tàm broă cih, sền swì nàng geh đau jơnau rơcăng cih Rơndăp broă lơh dơ̆ sơnrờp, yal tàm pơrjum bơh Mpồl đơng lam dơ̆ do dê.

Củ tịc lơgar đơs, neh geh bơta ring bal uă bè bơta gĭt wă, bơta kờñ ngan, bơta kwơmàng mờ bơta jŏ jòng bơh Rơndăp broă lơh “Broă lơh bơ̆t bơtàu mờ lơh gơs Dà lơgar gơnoar kơrnoăt boh lam xã hội củ nghĩa Việt Nam tus nam 2030, pơlam gùng tus nam 2045” jơh bal bè tàm sră pơ àr, bơta geh ngan mờ ală nùs nhơm kơlôi sơnơng tam gơl pa bơtàu tơnguh kơ̆ kơl jăp bơh dà lơgar dê bơh bơta đơng lam bồ bơh Đảng dê; geh cơng tàng adat boh lam mờ bơnàng jă cíñ trị nàng đơs nền ală broă gơ tơlik tus tàm ală tŭ lơh Rơndăp broă lơh”.

Cau mblàng Lơ Mu K’Yến