VOV4.K’ho- Drim ngai 10/06, tàm càr Quảng Nam, Củ tịc lơgar ồng Nguyễn Xuân Phúc đơng lam Pơrjum tă pơgồp jơnau đơs gơwèt mờ Jơnau rơcăng cih Rơndăp broă lơh “Broă rơndăp lơh lơh mờ lơh sir gơs dà lơgar gơnoar kơrnoăt boh lam xã hội củ nghĩa Việt Nam tus nam 2030, gùng dà tus nam 2045” ai jơnau đơs tă pơgồp bơh ală Tỉñ ủy, Thàñ ủy tiah tàm gùl lơgar mờ Tây Nguyên. Do là pơrjum dơ̆ 2 tơnơ̆ pơrjum dơ̆ dùl geh lơh tàm càr Quảng Ninh pơgăp mờ do dùl êt ngai.

Đơs tàm pơrjum, Củ tịc lơgar ồng Nguyễn Xuân Phúc đơs, ală Thàñ ủy, Tỉñ ủy neh geh uă jơnau đơs tă pơgồp jơh nùs jơh tồr, geh kơnòl, song dơ pă, lơh tờm tàm uă tơngume tờm kwơmàng bơh Rơndăp broă lơh dê. Tơngume neh đơs jơh geh wil tơl ală broă tờm kwơmàng tàm broă lơh mờ lơh sir gơs dà lơgar gơnoar kơrnoăt boh lam xã hội củ nghĩa Việt Nam. Ală broă tam gơl kwơmàng tàm jơnau rơcăng cih Rơndăp broă lơh neh gĭt nền di broă tờm kwơmàng; ală kơnòl broă, broă lơh ai tơlik nền cê ngan, loh làng ngan, dipal mờ jơnau kờñ ngan ngồn tàm rài kis. Củ tịc lơgar đơs là, ală jơnau đơs tơngŏ nùs nhơm tam gơl bơta yau gơ gơs bơta pa, jơnau kơp kờñ ngan geh tă pơgồp tàm broă lơh tam gơl pa mờ bơtàu tơnguh dà lơgar. Do kung là bơta gơn kơnờm nàng kwang bàng đơng lam Đảng, Dà lơgar đơng lam, sồr lơh lơh jăt geh cồng nha kơnòl broă lơh mờ lơh sir gơs dà lơgar gơnoar kơrnoăt boh lam xã hội củ nghĩa Làng bol dê, bơh Làng bol, tài Làng bol, bơh Đảng lam bồ.

Cau mblàng Lơ Mu K’Yến