Di dơ̆ tơngkah kir sơn rai 34 nam Ngai jơh làng bol sền gàr tiah nhàr lơgar, 64 nam Ngai bơhiàn Mpồl ling sền gàr tiah nhàr lơgar Việt Nam mờ 60 nam Ngai bơhiàn Họk viên Sền gàr tiah nhàr lơgar, drim ngai 28/02, Củ tịc lơgar ing mò Võ Thị Ánh Xuân tus còp mờ lơh broă tàm Họk viện Sền gàr tiah nhàr lơgar- Anih tờm bơto bơtê kwang bàng mờ kơlôi sơnơng khoa họk bơh Mpồl ling sền gàr tiah nhàr lơgar tàm Thị xã Sơn Tây, Hà Nội.

Đơs tàm dơ̆ lơh broă, Củ tịc lơgar ing mò Võ Thị Ánh Xuân đơs sùm, bơh bơta đơng lam bơh Quân ủy Dà lơgar, Ƀộ Quôk phòng mờ đơng lam tơn là bơh Ƀộ Tư lệñ Mpồl ling sền gàr tiah nhàr lơgar dê, Họk viên Sền gàr dà lơgar neh pơn đơl pràn lơh ngan bơt bơtàu mpồl lơh broă pràn kơl dang, kơ̆ kơljap, tơl làm, lơh jat niam 2 gơnoar broă là anih tờm bơto bơtê kơlôi sơnơng khoa họk mờ lơh broă sùm rcang lài tam lơh bơh Ƀộ Tư lệñ Mpồl ling sền gàr tiah nhàr lơgar dê. Tơngai bè tŭ do gam ai tơlik jơnau sồr, kơnòl broă sơlơ uă gơwèt mờ Mpồl ling sền gàr tiah nhàr lơgar đơs bal mờ Họk viện Sền gàr tiah nhàr lơgar đơs is tàm broă lơh bơt bơtàu, atbồ mờ sền gàr gơnoar tờm sền gàr lơngap lơngai tiah nhàr lơgar tàm bơta pa.