Đơs tàm dơ̆ đơng lam tàm Pơrjum, Củ tịc lơgar ồng Nguyễn Xuân Phúc đơs tờm ală cồng nha bơh dà lơgar nam 2022 tềng đăp mờ broă đơng lam bơh Đảng, lam bồ lài là Tổng Ƀí thư ồng Nguyễn Phú Trọng mờ đơs tờm, tàm ală cồng nha hơ̆ geh broă pơgồp bal kwơ màng bơh gah Kiểm sát ñân zân dê. Củ tịc lơgar pơn jờng gah Kiểm sát ñân zân lơh ngan, rơcang lài lơh jăt ndrờm bal uă broă lơh nàng lơh niam poan jơnau kờñ dờng, poh mpồl kơnòl tờm, geh mờ sơrlèt uă kơnòl, jơnau kờñ broă lơh geh Quốk hội jào. Tàm tơngai tus, Củ tịc lơgar ồng Nguyễn Xuân Phúc sồr gah Kiểm sát ñân zân mờ gah do mhar bơ̆t bơtàu broă lơh, broă rơndăp lơh jăt di tŭ, geh cồng nha ală kơnòl, broă lơh tàm Nghị quyết sồ 27 bơh Dà lơgar bè “Pơn jăt tai bơ̆t bơtàu mờ lơh gơs dà lơgar geh gơnoar adăt boh lam XHCN Việt Nam tàm tơngai pa”.