Tàm dơ̆ bơyai lơh, Củ tịc lơgar đơs nền, do là tŭ nàng dùl dơ̆ tai đơs nền ală tă pơgồp dờng màng bơh ală rơnàng kwang bàng, cau ling sền gàr tiah nhàr dà lơgar mờ gơnoar broă dờng màng bơh làng bol dê tàm sền gàr gơnoar tờm ù tiah, lơngăp lơngai tiah nhàr dà lơgar; ngui niam bơta pràn bơrlŭ bal bơh jơh gùt jơi bơtiàn dê lời ai broă lơh bơt bơtàu mờ sền gàr dà lơgar Việt Nam xã hội củ nghĩa in.

Ala mat kwang đơng lam bồ Đảng, Dà lơgar, Củ tịc lơgar Võ Văn Thưởng jàu Gai lòng Cồng nha tàm tam lơh khà 2 mờ pơyua jơnau nting bơr niam ngan rlau jơh tus ală rơnàng mpồl ling sền gàr tiah nhàr dà lơgar. Củ tịc lơgar sồr Mpồl ling sền gàr tiah nhàr dà lơgar, ală kâp, ală gah broă, ngan là ală tiah tiah nhàr dà lơgar git loh, đơs lài di broă gơlik geh, ngan là broă gơlik geh hờ bơdìh gùng nhàr dà lơgar gơ rềng tus broă lơh sền gàr tiah nhàr dà lơgar, rơcang lài geh broă lơh bơsong di, dipal; Sơlơ tơnguh tai broă lơh mblàng yal, bơto bơtê, tơnguh jơnau git wă, kơnòl broă, gơ wèt mờ kơnòl sền gàr gơnoar tờm ù tiah, lơngăp lơngai tiah nhàr dà lơgar, ngan là tàm ală ù tiah tiah nhàr dà lơgar, dà lềng, bồt bơlàu.