VOV4.K’ho- Pơn jăt dơ̆ lòt lơh broă tàm càr Thanh Hóa, drim ngai 29/08, Củ tịc lơgar ồng Nguyễn Xuân Phúc đơng lam dơ̆ lơh broă mờ Duh broă sùm Tỉñ ủy Thanh Hóa. Tus bal dơ̆ lơh broă do geh Phó Thủ tướng Cíñ phủ ồng Lê Văn Thành, kwang đơng lam bồ bàr pe ƀộ, ngàñ. Đơs tàm dơ̆ lơh broă, Củ tịc lơgar ồng Nguyễn Xuân Phúc yal tơngai nam 2029 là 1 rbô nam sơnđan mat Thanh Hóa.

Den tàng bè hơ̆, Đảng ƀộ, gơnoar ătbồ càr pal kơlôi sơnơng, lơh geh bơta bơtàu tơnguh pràn kơldang tơl làm wèt tus tơngkah kir sơntai tơngai kwơmàng bơh kơnhoàl ù tiah bềng bơhiàn kah yau do dê. Củ tịc lơgar đơs là, bơta bơtàu tơnguh bơh càr Thanh Hóa dê tŭ do ờ hềt ndrờm pal mờ jơnau kah yau bơtàu tơnguh kung bè bơta ƀươn bơta pràn bơh càr dê. Củ tịc lơgar sồr càr lơh ngan ngui niam jơh ală kơrnoăt krơi is geh Dà lơgar ai nàng bơtàu tơnguh mhar.

Kwơmàng, Củ tịc lơgar ồng Nguyễn Xuân Phúc tơngkah, bơtàu tơnguh lơh sa pal gơ jăt bal mờ bơtàu tơnguh niam chài mờ lơh jăt gơguh jak, ring bal mpồl bơtiàn. Sền gàr mờ ngui niam rài kis niam chài is tiah he dê, lơh kah wơl nùs nhơm pơniờ să is jơi bơtiàn dê, kơ̆p kờñ ngan bơtàu tơnguh ƀòn lơgar, dà lơgar.

Cau mblàng Lơ Mu K’Yến