VOV4.K’ho- Drim ngai 14/07, tàm Hà Nội, Củ tịc lơgar ồng Nguyễn Xuân Phúc, Kwang ătbồ Mpồl đơng lam lơh Rơndăp broă lơh “Broă lơh lơh mờ lơh sir gơs Dà lơgar gơnoar adat boh lam Xã hội Củ nghĩa Việt Nam tus nam 2030, gùng dà tus nam 2045” đơng lam Pơrjum duh broă sùm Mpồl đơng lam lơh broă mờ Đảng đoàn Mặt trận Dà lơgar Việt Nam bè tơngume jơnau rơcăng cih Rơndăp broă lơh.

Đơs wơl jơnau bơto sồr bơh Bác Hồ dê “Tam klăc, tam klăc, tam klăc dờng, cồng nha, cồng nha, cồng nha dờng”, Củ tịc lơgar ồng Nguyễn Xuân Phúc đơs nền, mặt trận dà lơgar Việt Nam là jơnau kwơmàng tàm lơh jăt nùs nhơm làng bol lơh tờm xã hội củ nghĩa, gơnoar lơh tờm bơh làng bol dê tàm bơ̆t bơtàu Dà lơgar gơnoar adat boh lam xã hội củ nghĩa Việt Nam. Tàm dơ̆ lơh broă, bàr pe broă tờm, bơtàu tơnguh mhar tàm broă lơh mờ lơh sir gơs Dà lơgar gơnoar adat boh lam xã hội củ nghĩa Việt Nam gơrềng tus anih, broă, gơnoar broă, kơnòl broă bơh Mặt trận dà lơgar Việt Nam dê kung geh cribơyai mờ lơh loh sơl. Uă tơngume gơrềng tus mpồl mờ broă lơh bơh Mặt trận dà lơgar Việt Nam dê geh Mpồl sền swì tơrgùm mờ cih tàm jơnau rơcăng cih Rơndăp broă lơh.

Cau mblàng Lơ Mu K’Yến