VOV4.K’ho- Mho ngai 24/05, Củ tịc lơgar ồng Nguyễn Xuân Phúc neh geh dơ̆ lơh broă mờ Mpồl Sền swì jơnau cih Rơndăp broă lơh “Broă rơndăp lơh bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam tus nam 2030, gùng dà broă lơh tus nam 2045”.

Đơs tàm dơ̆ lơh broă, Củ tịc lơgar jờng rơ ngan broă lơh ngan, jơh nùs mờ geh kơnòl bơh ală kwang bàng tàm Mpồl Sền swì jơnau cih Rơndăp broă lơh dê, ală jơnau rơcăng cih sră nggal Rơndăp broă lơh dê sền bal neh lơh geh jơnau sồr bè tơngume, tŭ tơngai bơh Mpồl đơng lam dê sồr; ồng Nguyễn Xuân Phúc sồr Mpồl Sền swì jơnau cih Rơndăp broă lơh do pơn jăt tai jăt nền tàm cồng nha kơlôi sơnơng tơngume is bơh ală anih lơh broă dê, jơnau đơs bơh kwang bàng tàm Mpồl đơng lam dê nàng lơh sir gơs jơnau rơcăng cih Rơndăp broă lơh.

Tàm hơ̆, tơrgùm lơh loh broă tờm bơh Rơndăp broă lơh dê; tam pà mờ gĭt nền loh làng rlau ală jơnau kờñ, kơnòl broă mờ gùng dà broă lơh bơh tŭ do tus nam 2030 mờ bơh nam 2030 tus nam 2045; đơs nền bơta đơng lam bơh Đảng dê, gùng dà broă lơh xã hội củ nghĩa, gơnoar broă lơh tờm bơh Làng bol dê tàm broă bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam.

Cau mblàng Lơ Mu K’Yến