VOV4.K’ho- Tàm broă lơh tus bal Pơrjum hòi jà bơcri priă tàm ală kơnhoàl: Củ Chi mờ Hóc Môn, ƀòn dờng Hồ Chí Minh, drim ngai 12/04, Củ tịc lơgar ồng Nguyễn Xuân Phúc neh lòt còp Tiah lơh sa sươn sre kông nghệ kao ƀòn dờng Hồ Chí Minh.

Tơnơ̆ tŭ lòt còp ală broă lơh, Củ tịc lơgar ồng Nguyễn Xuân Phúc jờng rơ ngan Tiah do neh lơh ngan lơh geh cồng nha niam ngan tàm broă lơh, lơh jăt kơnòl broă ờ mìng bơtàu tơnguh lơh sa sươn sre kông nghệ kao ƀòn dờng Hồ Chí Minh dê lơm mờ gam pal lơh gơnoar broă dong kờl lơh bơtàu tơnguh lơh sa sươn sre tiah đah jum măt tơngai lik dà lơgar mờ tiah ring đah jum măt tơngai mŭt dà lơgar dê in tai.

Củ tịc lơgar pà gĭt, Tiah lơh sa sươn sre kông nghệ kao ƀòn dờng Hồ Chí Minh là 1 tàm 10 tiah kông nghệ kao gùt lơgar dê geh bơta sền sơnơng bơtàu tơnguh uă rlau, neh lòt lài lam lài tàm broă tam phan, phan tàm dà, gơdờp mờ tam gơl trồ tiah, lơh sa sươn sre tiah drà. Tiah do neh ngui bồ tơngoh jak kòn bơnus lơh gơlik geh is tàm broă ròng ka ti mờ uă broă lơh lơh sa sươn sre; dong kờl uă ngan broă lơh tề lam lơh gơlik mpồl lơh sa kă bro sơnđờm mŭt lơh broă, mờ tàm jau kông nghệ.

Cau mblàng Lơ Mu K’Yến