Tàm broă lơh tus bal dơ̆ Guh lơh Bơtau bơh Bơtau lơgar Anh ồng Charles III dê,  drim ngai 05/05, jat jiơ tiah do dê, tàm càr lơgar London, Củ tịc lơgar Việt Nam ồng Võ Văn Thưởng tus còp Ƀảo tàng lơgar Anh- ù tiah kah yau tiơng pơn rơ neh geh tŭ là tiah ồng Karl Marx, Friedrich Engels, Lenin bal mờ uă cau geh ƀồ tơngoh dờng kơlôi sơnơng neh tus lơh broă mờ kơlôi sơnơng tàm broă lơh bơt bơtàu mờ lơh sir jơnau cih tàm sră pơ àr bè Củ nghĩa kộng sản khoa họk.

Tàm do, Củ tịc lơgar ồng Võ Văn Thưởng neh tus còp Cơldŭ sền sră bơh Ƀảo tàng dê, tus sền ală pang ƀăo cèng uă tềl lời wơl bơh ồng Karl Marx dê rài ồng gam ơm kis, lơh broă mờ kơlôi sơnơng bè Củ nghĩa kộng sản khoa họk tàm lơgar Anh. Jat sră nggal bơh Ƀảo tàng dê, tam uă nam, Karl Marx pơn jat tai bơtàu tơnguh bồ tơngoh bơh he dê mờ bơta lơh broă bal bơh uă cau triết họk lơgar Đức ồng Friedrich Engels mờ lĭp sră ală jơnau cih bơh ồng dê, kơlôi sơnơng tàm Cơldŭ sền sră Ƀảo tàng lơgar Anh dê. Ồng neh bal mờ ồng Friedrich Engels sùm sùm gơ mut tàm rài kah yau kòn bơnus dê bè ală cau crơng gơs geh Củ nghĩa kộng sản khoa họk geh gơrềng dờng màng mờ jrô ơnàng gơwèt mờ kòn bơnus gơguh jak dê.