VOV4.K’ho- Tơnơ̆ tŭ Mpồl coh plai U23 Việt Nam coh sa 1- 0 mpồl coh plai U23 Thái Lan, sền gàr gơtùi khà Jak ngan môn coh plai cau klau tàm dơ̆ Pơrlòng tàp pràn să jan tiah đah jum măt tơngai lik câu Á (Sea Games 31), Củ tịc lơgar ồng Nguyễn Xuân Phúc, Thủ tướng Cíñ phủ ồng Phạm Minh Chính, Củ tịc Quôk hội ồng Vương Đình Huệ mờ Ủy viên Ƀộ Cíñ trị, Duh broă sùm Ƀan Ƀí thư ồng Võ Văn Thưởng neh mù tàm ƀlàng coh plai gờm chờ mờ jàu Gai lòng Lơngo môn coh plai cau klau pà ală cau tàm Mpồl pơlam tàp mờ ală cau pơrlòng coh plai U23 Indonesia in; jàu Gai lòng Trà pà ală cau tàm Mpồl pơlam tàp mờ ală cau coh plai U 23 Thái Lan in; mờ jàu Gai lòng Biàng pà Cau ătbồ Mpồl cau pơlam tàp ồng Park- Hang-seo, ală cau tàm Mpồl pơlam tàp mờ ală “cau ling sơmañ Rmĭt” in, ală cau neh tàm pơrlòng jơh pràn he dê nàng cèng wơl bơta chờ hờp ai Dà lơgar in mờ bơta chờ hờp dờng ngan ai cau kờñ môn coh plai gùt lơgar in.

Ala măt kwang đơng lam bồ Đảng, Dà lơgar mờ cau kờñ môn coh plai tàm jơh gùt lơgar, Củ tịc lơgar ồng Nguyễn Xuân Phúc neh jờng rơ mờ ưn ngài ồng Park Hang-seo là cau ătbồ Mpồl cau pơlam tàp mờ ală cau coh plai U23 Việt Nam neh lơh gơs bơta kah yau tàm Sea Games 31. Thủ tướng Cíñ phủ ồng Phạm Minh Chính neh geh sră pơyua gờm chờ Mpồl pơlam tàp mờ Mpồl cau plai cau klau U23 dà lơgar Việt Nam tơnơ̆ tŭ Mpồl sền gàr gơtùi Gai lòng Biàng tàm Sea Games 31 tơn. Cồng nha lơh geh jak ngan ngai do, bal mờ Gai lòng Biàng bơh Mpồl coh plai cau ùr dê mờ cồng nha lơh geh ală môn tàp pràn să jan tàm pơrlòng tàm Sea Games 31 lơh geh neh đơs nền bơngă bơh coh plai Việt Nam dê đơs is mờ tàp pràn să jan Việt Nam dê đơs bal tàm kơnhoàl ù tiah do mờ rơhời cơnđòa guh ndrờm pal mờ dunia.

Cau mblàng Lơ Mu K’Yến