VOV4.K’ho- Di dơ̆ tơngkah kir sơnrai 77 nam Kăc màng Nhai Phàm mờ Sơntờm Dà lơgar ngai 02/09, 53 nam Bác Hồ sang rài, pơn jăt tai dơ̆ lòt lơh broă tàm càr Tuyên Quang, drim ngai 04/09, Củ tịc lơgar ồng Nguyễn Xuân Phúc lam bồ mpồl lơh broă jơh nùs kun bồ chu ñàng, pơdơng bơkàu kah kơlôi Củ tịc Hồ Chí Minh tàm Chi ràp Nà Nưa, tàm Tiah tềl lời wơl Dà lơgar dờng màng Tân Trào. Tềng đăp rùp duh khuai Hồ Chí Minh, Củ tịc lơgar ồng Nguyễn Xuân Phúc mờ mpồl lơh broă lời dùl tŭ kun bồ kah kơlôi Ồng. Củ tịc lơgar tơngŏ nùs nhơm gĭt ưn ngài uă ngan bè dà kơlhề jrô bè dà lềng, jơnhoa bè trồ bơh Ồng dê, cau Kwang ătbồ jak chài ngan, Cau Pơgru dờng pơnrơ ngan bơh Kăc màng Việt Nam dê, jơh dùl rài kis sùm tă pơgồp ai lơngăp lơngai is jơi bơtiàn in, tơrgùm dùl Dà lơgar, ai khăt gơboh is, lơngăp lơngai chờ hờp bơh làng bol dê.

Củ tịc lơgar ồng Nguyễn Xuân Phúc chu ñàng kah kơlôi Củ tịc Hồ Chí Minh tàm Chi ràp Nà Nưa, Tiah tềl lời wơl Dà lơgar dờng màng Tân Trào

Pơn jăt hơ̆, Củ tịc lơgar ồng Nguyễn Xuân Phúc mờ mpồl lơh broă chu ñàng tàm Đình duh khuai Tân Trào, ơm tàm tiah đah mat tơngai mŭt thôn Tân Lập, xã Tân Trào, là tiah geh lơh Pơrjum dờng làng bol gùt lơgar, mpồl bơh sơnrờp bơh Quôk hội Việt Nam dê, tàm ngai 16 nhai 08 nam 1945. Pơrjum dờng Tân Trào là dùl broă lơh lơh tềl bơta tam gơl tàm jơnau kah yau Kăc màng Việt Nam, lam lơh sơnđờm ntàu tam lơh ai geh gơnoar ătbồ dùl bă sơrbac mhar ngan rlau jơh, jal mhar ngan rlau jơh, nàng làng bol jơh gùt lơgar in ñă ntàu lơh tờm is rài kis he dê mờ dà lơgar he dê.

Củ tịc lơgar ồng Nguyễn Xuân Phúc kơ̆p kờñ ală cau tàm Mpồl gĭt wă geh kơnòl bè broă prăp gàr, sền gàr mờ ngui niam bơta kwơ niam chài krơi is ngan bơh đơs crih Then dê

Tàm Hìu niam chài thôn Tân Lập, xã Tân Trào, Củ tịc lơgar ồng Nguyễn Xuân Phúc kung neh lòt còp, pơndờm pơnđiang ală cau tàm Mpồl Then thôn Tân Lập, xã Tân Trào, kơnhoàl Sơn Dương. Củ tịc lơgar kơ̆p kờñ tơl nă cau tàm Mpồl Then thôn Tân Lập gĭt wă geh kơnòl bè broă prăp gàr, sền gàr, ngui niam bơta kwơ krơi is ngan bơh Tàp đơs Then dê, phan lời wơl niam chài ờ di là phan bơna neh geh UNESCO cih mat.

Cau mblàng Lơ Mu K’Yến