VOV4.K’ho - Drim òr (06/04), tàm càr Tiền Giang, Củ tịc lơgar ồng Nguyễn Xuân Phúc còp broă lơh tơrlòng lơh sa kă bro bơh Hợp ták xã thanh long Mỹ Tịnh An, kơnhoàl Chợ Gạo, dùl broă lơh geh cồng nha kơnờm mờ broă pơgồp bal làng bol lơh broă sa nền nòn, tàm hơ̆ uă ngan là sùm blơi plai thanh long ală cau tàm mpồl mờ khà priă kas rơlao mờ drà kă bro, gàr niam priă cồng geh 3 rơbô đong tàm 1 kĭ, bŭ lah drà kă bro gơtìp gơmù khà priă.

Củ tịc lơgar đơs niam hợp ták xã Mỹ Tịnh An geh broă lơh sa kă bro geh cồng nha, bơyai lơh pơgồp bal broă lơh sa niam, tơnguh bơtàu tiah tam phan tờm ngan kơnhoàl dê bè thanh long, lơ-u. Phan geh lơh gơs mờ kông nghệ gơguh jăk, gàr niam broă lơh uă, wèt tus mờ broă tăc hờ lơgar bơdìh jăt gùng dà broă tăc tờm ngan. Củ tịc lơgar kung sồr hợp ták xã Mỹ Tịnh An pơn jăt tai chồl pràn broă pơgồp bal, pờ ơnàng broă lơh sa tus mờ uă phan tờm ndai kơnhoàl dê, bơdìh mờ plai thanh long; geh broă tăc phan tàm lơgar mờ tăc mờ lơgar bơdìh.

Cau mblàng Ndong Brawl