VOV4.K’ho- Di dơ̆ tơngkah kir sơnrai Ngai Dunia Kơnòm dềt (01/06), drim ngai 31/05, Củ tịc lơgar ồng Nguyễn Xuân Phúc lòt còp, pơndờm pơnđiang mờ pà phan kơnòm dềt kuĕt kơlte in tàm Anih tờm Ròng siam sền gàr kơnòm dềt kuĕt kơlte Hà Nội tàm thị trấn Chúc Sơn, kơnhoàl Chương Mỹ.

Pơyua jơnau gờm chờ niam bơnĕ ngan rlau jơh tus mờ ală oh dềt di Ngai Dunia Kơnòm dềt, Củ tịc lơgar ồng Nguyễn Xuân Phúc cih dờp, jờng rơ ngan ală pơgru, ală kwang bàng, mờ cau lơh broă bơh Anih tờm do dê neh jơh nùs jơh tồr, geh kơnòl, bơh bơta kờñ gơboh ngan gĭt lơh, jơh nùs ngan ròng siam, sền gàr, bơto bơtê ai ală kơnòm dềt kuĕt kơlte in jơnau gĭt wă mờ bơta chài ơm kis ai ală oh in.

Đơs nền, Đảng, Dà lơgar sùm sền gròi tus ală oh dềt đơs bal mờ kơnòm dềt kuĕt kơlte đơs is, Củ tịc lơgar đơs loh, broă ròng siam, sền gàr kơnòm dềt kung kờñ bơta tàm sơm băt tê bal, geh kơnòl bal mờ nùs nhơm niam bơh jơh gùt mpồl bơtiàn dê. Di dơ̆ do, Củ tịc lơgar ồng Nguyễn Xuân Phúc pà Anih tờm ròng siam sền gàr kơnòm dềt kuĕt kơlte Hà Nội in 100 tơlak đong mờ hòi jà mpồl bơtiàn tă pơgồp bal pà Anih tờm do in măy mok phan ngui bơsram kờp priă 200 tơlak đong.

Cau mblàng Lơ Mu K’Yến