VOV4.K’ho - Di tàm dơ̆ rơcang wă rò satềp Ñâm Zần, Củ tịc lơgar ồng Nguyễn Xuân Phúc ala măt kwang đơng lam Đảng, Dà lơgar neh còp, pà phan lam sồr ală y, bác sĩ tàm ờ uă hìu sơnơm tàm ƀòn dờng Đà Nẵng là Hìu sơnơm Đà Nẵng mờ Hìu sơnơm C Đà Nẵng là ală hìu sơnơm lơh niam kơnòl kham sơm kòp cau kòp là làng bol kis tàm ƀòn dờng Đà Nẵng in bal mờ uă càr bơh Nghệ An tus ală càr tàm Tây Nguyên, mờ kung là ală hìu sơnơm lơh niam broă xét nghiệm, sơm kòp cau kòp Kovid-19 in.

Pơn jờng, dờp ală Hìu sơnơm bè ală cồng nha neh lơh geh, Củ tịc lơgar ồng Nguyễn Xuân Phúc pà git gam ờ tơl 20 ngai tai là tus satềp, củ tịc lơgar kơ̆p kờñ ală y, bác sĩ tơnguh cồng nha neh lơh geh, pơn jăt tai lơh ngan bơ̆t bơtàu Hìu sơnơm tàm ƀòn dờng Đà Nẵng gơs tiah tờm broă lơh sơnơm, geh broă lơh gơguh uă, di pal mờ broă kờñ kham, sơm kòp làng bol in, pơgồp bal tàm broă sền gàr bơta pràn kơl dang să jan, bơta gơboh gơbài làng bol he dê. Củ tịc lơgar pơyoa jơnau còp să, lam sồr bơh kwang đơng lam Đảng, Dà lơgar tus mờ gah lơh sơnơm ƀòn dờng Đà Nẵng, tàm hơ̆ uă ngan là ală hìu sơnơm sơm kòp làng bol, tàm hơ̆ uă ngan là ală hìu sơnơm gơrềng bal tàm broă rơcang sơndră mờ kòp Kovid-19 pa do.

Cau mblàng Ndong Brawl