VOV4.K’ho- Di dơ̆ tơngkah kir sơnrai 47 Ngai tơngklàs jơh gùt tiah đah jum, tơrgùm dùl dà lơgar, 68 nam ngai Tam lơh pha lik kah yau Điện Biên Phủ, mho ngai 27/04, Ủy viên Ƀộ Cíñ trị, Củ tịc lơgar ồng Nguyễn Xuân Phúc, Củ tịc Mpồl duh broă Sền gàr dà lơgar mờ Lơngăp lơngai, Kwang ătbồ Mpồl ling klàng phàu crong làng bol neh lòt còp mờ lơh broă mờ Kụk Lơngăp lơngai dơlam is lơgar.

Củ tịc lơgar tàp mpồl ling pơñiờ să

Đơs sồr lơh tàm dơ̆ lơh broă mờ Kụk Lơngăp lơngai dơlam is lơgar, Củ tịc lơgar ồng Nguyễn Xuân Phúc đơs nền, tàm dơ̆ sò tơm mờ ntàu tam lơh dờng bơh ling klàng mờ làng bol he dê tàm kàl prang nam 1975, mpồl ling Lơngăp lơngai tiah đah jum dà lơgar, tàm hơ̆ geh mpồl ling Lơngăp lơngai dơlam is lơgar neh tus bal jơh nùs tàm ală tiah sò tơm mờ pôs đồng bơh ling ngụy, gơnoar ătbồ ngụy dê, lơh gơprah gơpring jơh ală bơta dră wơl bơh bol pơrlơ̆ dră mờ dà lơgar dê, sơrbac mhar ngan sơgràm geh ală jơnau kờñ neh geh jàu kơnòl, pơgồp bơnah lơh gơprah gơpring jơh mpồl tam lơh mờ mpồl kơryan bơh Mỹ ngụy dê, bal mờ ling klàng mờ làng bol he tơngklàs jơh gùt tiah đah jum, tơrgùm dùl dà lơgar.

Đơs tàm tus tơngai, Củ tịc lơgar sồr Kụk Lơngăp lơngai dơlam is lơgar pơn jăt tai yal tai bơta đơng lam, sồr lơh dờng ngan rlau jơh, tơl làm bơh Đảng dê tàm tŭ lơh jăt kơnòl broă sền gàr lơngăp lơngai dà lơgar dê.

Cau mblàng Lơ Mu K’Yến