VOV4.K’ho - Mang òr (24/02), jăt jơ tàm tiah do, rơndeh par pơn diang Củ tịc lơgar ồng Nguyễn Xuân Phúc bal mờ pơ-ùr mờ mpồl kwang bàng dờng màng lơgar Việt Nam neh tus ƀlàng rơndeh par dunia Changi, sơn đờm broă tus còp kấp Dà lơgar tus lơgar Singapore.

                       Củ tịc lơgar ồng Nguyễn Xuân Phúc còp mùl màl lơgar Singapore

Wă Củ tịc lơgar, pơ-ùr mờ mpồl kwang bàng tàm ƀlàng rơndeh par, đah lơgar Singapore geh Ƀộ trưởng Ngoại giao ồng Vivivan Balakrishnan, Đại sứ lơgar Singapore tàm lơgar Việt Nam ồng Jaya Ratnam. Bè đah lơgar Việt Nam geh Đại sứ lơgar Việt Nam tàm lơgar Singapore ồng Mai Phước Dũng, kwang bàng bal mờ cau lơh broă tàm Đại sứ quán lơgar Việt Nam tàm lơgar Singapore. Jăt broă lơh, tàm hơ̆ tus còp, Củ tịc lơgar ồng Nguyễn Xuân Phúc geh ală dơ̆ cri bơyai mờ Kwang atbồ lơgar Singapore mò Halimah Yacob, Cri bơyai mờ Thủ tướng lơgar Singapore ồng Lý Hiển Long, cri bơyai mờ Củ tịc Quốk hội ồng Tan Chuan-Jin. Ală dơ̆ tìp dờng màng do kờñ chồl pràn broă lơh bal đah bàr lơgar bè neh geh kĭ hơ bal, cri bơyai ală broă lơh bal pa, lơh niam rơlao broă lơh git gơ̆t jŏ jòng đah lơgar Việt Nam mờ lơgar Singapore. Ală ƀộ, gah lơh broă, mpồl lơh sa kă bro đah bàr lơgar kung geh cri bơyai ală sră nggal lơh broă bal tàm ală gah lơh sa, kă bro, sền gàr dà lơgar, thông tin mờ truyền thông, khoa họk mờ kông nghệ...

Cau mblàng Ndong Brawl