Lài mờ sa tềp bơhiàn yau Quý Mão 2023 mờ di tơngkah kir sơnrai 93 nam Ngai crơng gơs Đảng, jat bơhiàn ờs mờng jơi bơtiàn dê, ngai 11/01, tàm ƀòn dờng Hồ Chí Minh, Củ tịc lơgar ồng Nguyễn Xuân Phúc neh tus ơn guàng bơkàu, chu ñàng kah kơlôi Củ tịc Hồ Chí Minh; còp, pà phan, nting bơr sa tềp ală hìu bơnhă kwang đơng lam bồ Đảng, Dà lơgar neh sang rài. Chu ñàng, ơn guàng bơkàu tàm Ƀảo tàng, Củ tịc lơgar ồng Nguyễn Xuân Phúc mờ Mpồl kwang bàng neh lời dùl phuk kah kơlôi Củ tịc Hồ Chí Minh- Cau ling khin cha jak chài tơngklàs jơi bơtiàn- cau niam chài jak ngan bơh jơi bơtiàn Việt Nam dê.

Ai tơnggŏ nùs nhơm kah ưn ngài uă ngan tus Củ tịc Hồ Chí Minh – neh ơn să jơh rài kis he dê ai broă lơh tam lơh tơngklàs jơi bơtiàn, tơrgùm dùl dà lơgar, bơt bơtàu dà lơgar Việt Nam xã hội củ nghĩa ring lơngai, lơngăp lơngai is, tơrgùm dùl. Tus chu ñàng Đại tướng Lê Đức Anh, Củ tịc lơgar bơh nam 1992 tus nam 1997, Củ tịc lơgar ồng Nguyễn Xuân Phúc đơs loh, bulah tàm gơnoar broă lơi, ƀồc ồng Lê Đức Anh kung cèng bơta jơh nùs, tă pơgồp uă jơnau đơs kuơmàng tàm ală broă dờng bơh dà lơgar dê.