VOV4.K’ho - Drim òr (29/03), Củ tịc lơgar ồng Nguyễn Xuân Phúc bal mờ mpồl kwang bàng lơh boă neh tus sền ờ uă broă lơh sa lơh broă bal, hợp ták xã lơh broă geh cồng nha tàm gah lơh sa suơn sre tàm ƀòn dờng Sa Đéc mờ kơnhoàl Tháp Mười, càr Đồng Tháp.

   Củ tịc lơgar ồng Nguyễn Xuân Phúc còp broă lơh sa bơh hợp ták xã drơng broă suơn sre Mỹ Đông 2

Tơnơ̆ mờ tŭ iăt jơnau yal, Củ tịc lơgar ồng Nguyễn Xuân Phúc đơs niam ală broă lơh sa bal tàm gah lơh sa suơn sre, tơnguh bơtàu lơh sa suơn sre pơgồp bal mờ nhơl chờ, geh bal phan tăc mờ lơgar bơdìh, cèng geh cồng nha uă. Tus còp broă lơh sa bơh hợp ták xã broă lơh drơng ala suơn sre Mỹ Đông 2 tàm kơnhoàl Tháp Mười, Củ tịc lơgar ồng Nguyễn Xuân Phúc đơs niam hợp ták xã geh broă lơh geh cồng nha, tàm hơ̆ uă ngan là neh ngui khoa họk kông nghệ kao tàm broă lơh, tềm pềr priă tă, sền gàr tiah kis mờ lơh geh uă ngan broă lơh sa. Hợp ták xã neh lơh jăt niam jơh broă lơh drơng ala blơi mờ tăc, chồl prà broă pơgồp bal mờ mpồl lơh sa kă bro dong kờl kòi phe geh khà tăc mờ lơgar bơdìh. Củ tịc lơgar đơs là, do kung là broă lơh geh cồng nha mờ kơnhoàl Tháp Mười mờ càr Đồng Tháp pal geh lơh uă.

Cau mblàng Ndong Brawl