Đơs tàm dơ̆ cri bơyai, Kwang atbồ lơgar Hàn Quốk ồng Yoon Seok Yeol đơs tờm, lơgar Hàn Quốk sền lơgar Việt Nam là lơgar lơh broă bal kwơ màng, ai lài tàm broă lơh bal mờ lơgar ndai lơgar Hàn Quốk dê tàm tiah do.

Tàm tơngu me ală cồng nha kwơ màng neh lơh geh, mờ nùs nhơm pin dờn pràn kơl dang tàm rài tơnơ̆ do dê, lơh broă bal đah bàr lơgar, bàr kwang đơng lam kung yal bơr tơnguh uă bơta git gơ̆p đah lơgar Việt Nam mờ lơgar Hàn Quốk tus khà “Lơh broă bal jŏ jòng tơl ală bơta”, pờ geh dùl tơngai tơnguh bơtàu pa ai bơta git gơ̆p đah bàr lơgar in. Bàr gah ring bal lơh pràn tơl ală bơta lơh broă bal bè kă bro, bơcri priă, lơh broă bal tơnguh bơtàu mờ tam gơl kông nghệ, pơgồp bal tàm broă brồ guh mờ tơnguh bơtàu lơh sa, mpồl bơtiàn gơdờp bal mờ bơta pa. Tơn jơh cri bơyai, bàr kwang đơng lam neh tơlik jơnau yal bơr bal đah lơgar Việt Nam mờ lơgar Hàn Quốk bè bơta git gơ̆p lơh broă bal jŏ jòng tơl ală bơta nàng wèt tus ai broă lơh, lơh broă bal pin dờn nền nòn đah bàr lơgar tàm jơh ală gah broă ngai sơlơ nền nòn, mùl màl mờ geh cồng nha rơlao.