VOV4.K’ho- Tàm dơ̆ lòt còp kâp Dà lơgar tus lơgar Singapore, mho ngai 25/02, tàm Hìu Quôk hội lơgar Singapore, Củ tịc lơgar Việt Nam ồng Nguyễn Xuân Phúc neh geh dơ̆ tìp măt cribơyai broă mờ Củ tịc Quôk hội lơgar Singapore ồng Tan Chuan- Jin.

Củ tịc Quôk hội Singapore ồng Tan Chuan- Jin jơh nùs gờm chờ dơ̆ lòt còp bơh Củ tịc lơgar Việt Nam ồng Nguyễn Xuân Phúc dê mờ tơlik nùs nhơm tơngŏ bơta chờ hờp tềng đăp cồng nha niam bơnĕ ngan bơh ală dơ̆ tìp măt, cribơyai broă đah Củ tịc lơgar ồng Nguyễn Xuân Phúc mờ Kwang ătbồ lơgar Singapore mò Halimah Yacob mờ Thủ tướng Singapore ồng Lý Hiển Long mơkung gờm chờ Việt Nam bè ală cồng nha bơtàu tơnguh lơh sa mpồl bơtiàn tàm tơngai lài neh lơh geh bulah ală bơta gơrềng bơh kòp dờng Kovid-19 dê.

Củ tịc lơgar Việt Nam đơs nền, Việt Nam sùm sền dờng màng mờ kơ̆p kờñ lơh tơnguh bơta gĭt gơ̆p Tam klăc lơh broă bal jŏ jòng mờ Singapore, sồr bàr gah sơlơ tàm yal tơngĭt bal mờng chài ai tơlik gùng dà broă lơh kơrnoăt boh lam nàng di tŭ dong kờl Cíñ phủ bàr lơgar tàm broă rơcăng sơndră kòp bơtờp, lơh niam wơl tiah bơcri priă kă bro nàng dong bơtàu tơnguh wơl lơh sa- mpồl bơtiàn tàm bơta “bè ờs pa”; lam lơh ală broă lơh lơh broă bal ndrờm pal mờ bơta gĭt gơ̆p Tam klăc lơh broă bal jŏ jòng đah 2 lơgar.

Cau mblàng Lơ Mu K’Yến