Drim ngai 06/12, tơnơ̆ tŭ tus bal Cribơyai mpồl lơh sa kă bro Việt Nam mờ Hàn Quôk tàm càr lơgar Seoul bal mờ rlau 500 nă cau ala măt tus bơh ală mpồl lơh sa kă bro bơh 2 lơgar dê, Củ tịc lơgar ồng Nguyễn Xuân Phúc neh đơng lam dơ̆ Cribơyai mờ ală Tập đoàn, mpồl lơh sa kă bro dờng lơgar Hàn Quôk dê tàm gah broă priă jền mờ ngân hàng.

Tàm dơ̆ cribơyai, Củ tịc lơgar Việt Nam đơs nền, Việt Nam sùm sền Hàn Quôk là lơgar tam klăc lơh broă bal tờm kwơmàng mờ jŏ jòng; kơ̆p kờñ bal mờ Hàn Quôk lơh jrô ơnàng rlau tai bơta gĭt gơ̆p Tam klăc lơh broă bal jŏ jòng tơl ală bơta mờ broă tờm mờ bơta gơn kơnờm kwơmàng là lơh broă bal bè lơh sa, kă bro mờ bơcri priă.

Củ tịc lơgar đơs sùm bè gùng dà broă lơh pa bơh Việt Nam dê nàng kờñ lơh gơlik bơta ƀươn ƀoài rlau, geh cồng nha rlau mờ ală priă FDI bơcri tàm Việt Nam. Jăt mờ hơ̆, Việt Nam tam gơl bơh mìng ƀươn ƀoài “gơhòi gơ jà” priă FDI lài do, tus “lơh broă bal” gơcèng bơta jŏ tơngai mờ ală cau bơcri priă lơgar ndai jăt tàm nùs nhơm ring bal, bơtàu tơnguh bal, geh kwơ bal, geh kơnòl bal mờ mpồl bơtiàn, cau lơh broă, sền gàr tiah ơm kis.