VOV4.K’ho- Pơn jăt tai ală broă lơh tàm càr lơgar Tokyo, ngai 26/09, Củ tịc lơgar ồng Nguyễn Xuân Phúc neh cribơyai mờ Củ tịc Thượng viện lơgar Nhờk ồng Otsuji Hidehisa. Củ tịc lơgar ồng Nguyễn Xuân Phúc tơlik nùs nhơm tam pà bal bơta muăt jrùm uă ngan bơh Kwang đơng lam bồ Đảng, Dà lơgar, Quôk hội mờ làng bol Việt Nam dê pơyua tus Thượng viện kung bè làng bol lơgar Nhờk bè bơta sang rài nisơna ngan bơh ƀồc Thủ tướng Nhờk lài do ồng Shinzo Abe; jờng rơ ngan bơta gĭt gơ̆p lơh broă bal đah nghị viện bàr lơgar gam geh ală bơta bơtàu tơnguh pràn ngan tàm ală nam rềp ndo.

Củ tịc lơgar ồng Nguyễn Xuân Phúc đơs là, tơngai lài, bơta gĭt gơ̆p Tam klăc lơh broă bal jŏ jòng jrô ơnàng làm uă, tìp măt lơh kwèng, lơh broă bal đah Quôk hội bàr lơgar ngai sơlơ niam bơnĕ mờ geh cồng nha. Jăt tàm bơta hơ̆, Củ tịc lơgar kơ̆p kờñ bàr lơgar sơlơ tơnguh rlau tai ală broă lơh broă bal, ngan là tàm dơ̆ tơngkah kir sơnrai 50 nam lơh bơta gĭt gơ̆p cribơyai broă mờ lơgar ndai tàm nam 2023.

Cau cih VOV.VN- Cau mblàng Lơ Mu K’Yến