VOV4.K’ho - Tềng đăp mờ bơta kal ke tàm lơgar Ukraine, broă dong kờl làng bol lơgar Việt Nam tàm lơgar Ukraine dờp geh broă sền gròi uă ngan bơh kwang đơng lam Đảng, Dà lơgar he. Mho òr (06/03), tàm gơlang Củ tịc, Củ tịc lơgar ồng Nguyễn Xuân Phúc neh iăt Ƀộ Ngoại giao mờ ală anih lơh broă geh gơnoar yal bè broă do. Jăt jơnau yal bơh Ƀộ Ngoại giao, tŭ do, tàm lơgar Ukraine geh 7 rơbô nă cau lơgar Việt Nam.

Uă cau lơgar Việt Nam kung neh ntrờn is lik bơdìh tiah tam lơh ling klàng nàng tus tàm tiah niam ờ do ờ dă bè tus ală lơgar rềp bal bè Ba Lan, Hungary, Bulgaria. Ƀộ Ngoại giao neh lơh broă mờ ală anih lơh broă geh gơnoar lơgar Nga bal mờ lơgar Ukraine, Liên hợp quốc mờ ală lơgar geh cau lơgar Việt Nam ntrờn tus nàng gàr niam broă ntrờn ờ do ờ dă kung bè tŭ tus tàm anih ntrờn geh dong kờl di tŭ bè broă sàu sa, ơm kis. Tàm dơ̆ lơh broă, Củ tịc lơgar đơs tờm, pal lơh jăt niam ngan broă dong kờl làng bol, ờ gơtùi lời làng bol lơgar Việt Nam gơtìp chơ̆t, sồt să tàm lơgar Ukraine. Củ tịc lơgar pơn jờng Cíñ phủ geh rơndăp broă bơyai lơh ai ală rơndeh par ờ sa priă jun ală cau gơtìp kal ke mờ kờñ rê hờ lơgar; mờ sồr tàm bơta do, pal lơh jăt di kơrnoăt, ai lài cau ùr mờ kơnòm dềt, bal mờ cau kra.

Cau mblàng Ndong Brawl