VOV4.K’ho - Drim òr (06/06), tàm ƀòn dờng Hạ Long, càr Quảng Ninh, Củ tịc lơgar ồng Nguyễn Xuân Phúc, Kwang atbồ Mpồl đơng lam dà lơgar bơ̆t bơtàu rơndăp broă neh đơng lam pơrjum pơgồp jơnau đơs bơh ală tỉñ ủy, thàñ ủy tàm tiah hờ đah tô dà lơgar gơwèt mờ rơndăp broă bơ̆t bơtàu mờ lơh gơs Dà lơgar gơnoar adăt boh lam Xã hội chủ nghĩa Việt Nam tus nam 2030, wèt tus nam 2045.

Củ tịc lơgar ồng Nguyễn Xuân Phúc đơng lam Pơrjum pơgồp jơnau đơs tàm rơndăp broă bơ̆t bơtàu Dà lơgar gơnoar adăt boh lam Xã hội chủ nghĩa

Tàm pơrjum, ală tỉñ ủy, thàñ ủy tàm tiah hờ đah tô dà lơgar ring bal mờ ală broă lơh pràn neh geh đơs tàm Rơndăp broă, tàm hơ̆ tơnguh broă tam pà bal gơnoar, mờ ai geh jơnau đơs pơgồp bal nàng lơh loh rơlao tai tàm rơndăp broă bè bơta git gơ̆p đah Dà lơgar mờ gơnoar atbồ ală tiah bal mờ broă lơh mùl màl nàng tơnguh broă tam pà kấp, tam pà gơnoar ndrờm bal, geh ai uă broă lơh tờm, dờp kơnòl is. Đơs tàm dơ̆ pơn dŭt pơrjum, Củ tịc lơgar ồng Nguyễn Xuân Phúc đơs niam ală tỉñ ủy, thàñ ủy tàm tiah hờ đah tô dà lơgar neh geh uă jơnau đơs pơgồp bal jơh nùs mờ ring bal uă gơwèt mờ rơndăp broă geh ai, mờ sồr ală tỉñ ủy, thàñ ủy pơn jăt tai kơlôi sơnơng rơndăp broă geh ai nàng geh uă jơnau đơs pơgồp bal gơwèt mờ rơndăp broă geh ai do.

Cau mblàng Ndong Brawl