VOV4.K’ho- Tàm dơ̆ lòt còp kấp dà lơgar tus lơgar Singapore, tàm ngai 25/02, Củ tịc lơgar ồng Nguyễn Xuân Phúc neh wă kwang đơng lam bồ 2, 3 Tập đoàn khà dùl lơgar Singapore dê tàm ală gah năng lượng, bơtàu tơnguh tiah drà; ù tiah, hìu đam, phan bơna lơh sa mờ măi mok... Wă kwang đơng lam bồ Tập đoàn Kappel, Củ tịc lơgar ồng Nguyễn Xuân Phúc đơs niam Tập đoàn neh bơcri priă geh cồng nha tàm lơgar Việt Nam tàm tơngai lài, sồr Tập đoàn bơcri priă tàm lơgar Việt Nam tàm ală gah năng lượng gơlik wơl, năng lượng sàng goh, phan bơna mờ tiah drà ngac ngar. Ală rơndap broă pal geh broă lam lơh dờng, tam gơl pa, bơceh pa, geh bơta gơ rề uă tàm Việt Nam.

Wă kwang đơng lam bồ 2, 3 Tập đoàn khà dùl lơgar Singapore, Củ tịc lơgar ồng Nguyễn Xuân Phúc đơs nền, Việt Nam pơn jờng mpồl lơh sa kă bro Singapore bơcri priă tàm ală gah phan bơna, năng lượng, lơh sa mờ măi mok mòn gơs phan, lơh sa suơn sre geh bơta niam uă, kông nghệ thông tin, tiah drà ngac ngar, broă drơng ala priă jền, ngân hàng. Đơs nền, tơnguh bơcri priă là dùl broă geh lơh lài ngan bơh Việt Nam dê tàm tơngai tus, Củ tịc lơgar sồr Liên đoàn mpồl lơh sa kă bro Singapore pơn jat tai là rbàng tơrbŏ chul chồl mpồl lơh sa kă bro Singapore bơcri priă tàm lơgar Việt Nam, pơgồp bơnah lam git gơp 2 lơgar bơtàu tơnguh tus khà pa.

Cau mblàng K’Duẩn