VOV4.K’ho- Mho ngai 22/03, tàm Hìu duh broă Củ tịc, Củ tịc lơgar ồng Nguyễn Xuân Phúc, Kwang ătbồ Mpồl đơng lam lơh Rơndăp broă lơh “Broă lơh bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam tus nam 2030, gùng dà kơlôi tus nam 2045” neh geh dơ̆ tìp măt mờ ală cau jak chài, cau mờng chài gah lơh broă do, ală kwang bàng tàm Mpồl sền swì cih Rơndăp broă lơh kwơmàng do.

Dơ̆ tìp măt geh lơh tơnơ̆ cồng nha niam bơnĕ ngan bơh 3 dơ̆ cribơyai kâp dà lơgar tàm pe tiah: Đah tô- tàm gùl mờ đah jum dà lơgar bơh Mpồl đơng lam dê bơyai lơh, hòi tơrgùm geh gĭt nđờ rhiang jơnau cih đơs, tă pơgồp jơnau đơs bơh ală cau mờng chài gah lơh broă do, cau kơlôi sơnơng, cau ătbồ, cau jak chài kơrnoăt boh lam khà dùl dà lơgar dê bè ală broă gơrềng tus bơ̆t bơtàu mờ lơh sir gơs Dà lơgar gơnoar kơrnoăt boh lam xã hội củ nghĩa Việt Nam. Đơs tàm dơ̆ tìp măt, ala măt Mpồl đơng lam, Củ tịc lơgar ồng Nguyễn Xuân Phúc jờng rơ uă ngan cồng nha kơlôi sơnơng ală tơngume, cồng nha lơh broă tus tơngai do, mơkung đơs nền bơta lơh ngan jơh nùs, lơh mhar rlau tai tŭ tơngai lơh gơs mơkung pal lơh geh bơta niam broă lơh bơ̆t bơtàu rơndăp broă lơh.

Cau mblàng Lơ Mu K’Yến