Pơrjum geh bơta tus bal bơh rlau 850 nă kwang đơng lam bồ ală mpồl lơh sa kă bro khà dùl dunia mờ kơnhoàl ù tiah do, mờ kwang bàng ala măt bơh ală mpồl dunia dê.

Đơs tàm dơ̆ pơrjum, Củ tịc lơgar Việt Nam ồng Nguyễn Xuân Phúc yal bàr pe bơta lòng gơwèt mờ kă bro mờ bơcri priă dunia dê, bè gơguh kă bro gùt plai ù nam do mìng lơh geh khà 3,5% lơm mờ gơmù pràn gam 1% tàm nam tơnơ̆; ală bơta tam lơh tàm gơjrañ bè ù tiah cíñ trị, giă năng lượng mờ kòi phe gơguh jơnhoa, lơh gơkòl ală anih lơh gơlik phan, giă priă gơmù uă. Củ tịc lơgar ồng Nguyễn Xuân Phúc kung neh yal ală bơta pràn mờ tŭ niam tŭ lơh broă bal mờ lơgar Việt Nam, tàm hơ̆ neh kĭ hơ mờ lơh jăt mờr 60 hiệp địñ hòi jà, sền gàr dong kờl bơcri priă mờ lơh jăt 15 hịêp địñ kă bro khăt gơboh (FTA), tàm hơ̆ geh uă FTA rài pa.