VOV4.K’ho- Mho ngai 23/03, tàm Gơlăng Củ tịc, Củ tịc lơgar ồng Nguyễn Xuân Phúc neh hòi điện thoại cribơyai mờ  Kwang ătbồ lơgar pa geh pồ bơh lơgar Hàn Quôk dê ồng Yoon Suk-yeol. Ală măt Dà lơgar mờ làng bol Việt Nam, Củ tịc lơgar ồng Nguyễn Xuân Phúc neh gờm chờ ồng Yoon Suk-yeol geh pồ lơh Kwang ătbồ lơgar dơ̆ 20 bơh lơgar Hàn Quôk dê; mơkung pơyua jơnau còp să bơh Tổng Ƀí thư ồng Nguyễn Phú Trọng mờ ală kwang bàng đơng lam bồ Việt Nam tus Kwang ătbồ lơgar pa geh pồ bơh lơgar Hàn Quôk ồng Yoon Suk-yeol.

Kwang ătbồ lơgar pa geh pồ ồng Yoon Suk-yeol đơs nền sùm sền dờng màng bơta gĭt gơ̆p mờ lơgar Việt Nam mờ kơ̆p kờñ bàr gah sơlơ tơnguh bơta gĭt gơ̆p bơtàu tơnguh rlau tai tàm tơngai tus. Kwang đơng lam bồ bàr lơgar dùl nùs ring bal tàm tơngai tus geh bal mờ gơ̆p pơn jăt tai lơh sùm ală broă lơh tàm pơgơl mpồl mờ tìp măt kwang bàng kâp dờng, ală kâp mờ uă broă lơh dipal tàm tơngai pa; kờñ bal broă sơlơ lơh broă bal sền gàr lơngăp lơngai, sền gàr dà lơgar mờ lơh sa mờ măy mok sền gàr dà lơgar; lơh broă bal niam bơnĕ lam lơh ală broă lơh di tơngkah kir sơnrai 30 nam ngai lơh bơta gĭt gơ̆p lơh broă bal đah Việt Nam mờ Hàn Quôk (1992- 2022).

Cau mblàng Lơ Mu K’Yến