VOV4.K’ho- Mho ngai 12/08, tàm Hà Nội, Ƀộ Kwang àng bơyai lơh dơ̆ jàu Kơrnoăt bơh Củ tịc lơgar dê ai sỹ quan lòt lơh jăt kơnòl broă sền gàr ring lơngai Liên hợp quôk mờ kơrnoăt lơh cơldŭ lơh broă sùm Ƀộ Kwang àng bè sền gàr ring lơngai Liên hợp quôk. Lơh jăt jơnau sồr lơh pràn mŭt gơrờm bal mờ dunia mờ lơh broă mờ lơgar ndai bè lơngăp lơngai sền gàr dà lơgar tàm gah broă lơh sền gàr ring lơngai, ngai 15/6/2021, Ƀộ trưởng Ƀộ Kwang àng kĭ Kơrnoăt lơh Cơldŭ lơh broă sùm Ƀộ Kwang àng bè sền gàr ring lơngai Liên hợp quôk.

Tơnơ̆ tŭ lơh, Cơldŭ lơh broă do neh pơgồp bal mờ Liên hợp quôk bơyai lơh ai 23 nă sỹ quan in lòt bơsram, pơlam tàp mờ cih mat dan lơh ală broă sền gàr ring lơngai Liên hợp quôk dê. Tus tŭ do, Ƀộ Kwang àng neh geh 8 nă sỹ quan geh Liên hợp quôk sền swì, lơh geh ală jơnau sồr bè tus bal tàm mpồl ling sền gàr ring lơngai. Đơs tàm dơ̆ bơyai lơh, Củ tịc lơgar ồng Nguyễn Xuân Phúc đơs loh, broă ai mpồl ling tus bal lơh broă sền gàr ring lơngai Liên hợp quôk là dùl kơnòl broă kwơmàng, pơgồp bơnah lơh jăt ală jơnau hơ, kơnòl bơh Dà lơgar Việt Nam dê mờ mpồl bơtiàn dunia bè sền gàr ring lơngai tàm dunia. Di tàm dơ̆ do, Củ tịc lơgar ồng Nguyễn Xuân Phúc neh jàu Kơrnoăt bơh Củ tịc lơgar dê ai Trung tá Nguyễn Ngọc Hải in lơh broă tàm hìu duh broă Liên hợp quôk dê mờ pà bơkàu gờm chờ 3 nă oh mi lơh kơnòl broă tàm lơgar đah jum Sudan.

Cau mblàng Lơ Mu K’Yến