VOV4.K’ho- Di dơ̆ tus bal Dơ̆ sơn đờm ai ngui Hìu duh khoai cau ling chơt màng tiah tam lơh Điện Biên Phủ mờ lơh broă tàm càr Điện Biên tàm 2 ngai, 17 mờ 18/5, Củ tịc lơgar ồng Nguyễn Xuân Phúc neh chu ñàng, ơn bơkàu kah kơlôi ală cau ling khin cha jak chài chơt màng tàm ƀlàng tơp ƀồc cau ling chơt màng dà lơgar A1, lòt sền Ƀảo tàng pha lin kah yau Điện Biên Phủ; còp, pà mờr 160 bơnah phan ai ală cau ling yau Điện Biên tàm càr in.

Củ tịc lơgar ồng Nguyễn Xuân Phúc mờ Mpồl kwang bàng neh ki ngàm chu ñàng kah kơlôi, kah ưn ngài ală cau ling khin cha jak chài tàm ƀlàng tơp ƀồc cau ling chơt màng dà lơgar A1. Pơn jat hơ̆, Củ tịc lơgar ồng Nguyễn Xuân Phúc lòt sền Ƀảo tàng pha lin kah yau Điện Biên Phủ, là tiah ràng tơlik, yal tơnggit ală sră nggal, phan lời kir bè dơ̆ tam lơh Điện Biên Phủ.

Cih tàm sră kah kir tàm Ƀảo tàng, Củ tịc lơgar ồng Nguyễn Xuân Phúc ai tơnggŏ bơta ngoh rơngac ngan tŭ còp Ƀảo tàng là anih prap gàr ală phan lời kir, rùp hin, nùs nhơm khin cha jak chài mờ nùs nhơm phi să bơh ală cau ling khin cha jak chài chơt màng, cau ling Điện Biên dê tàm dơ̆ tam lơh Điện Biên Phủ tàm sùm 56 ngai mang, lơh gơs pha lin dờng màng tiơng pơn rơ làm gùt ù tiah, lơh rơnggô jơh gùt plai ù.

Cau mblàng K’Duẩn