VOV4.K’ho - Pơn jăt tai broă lơh tàm càr An Giang, drim òr (18/01), tàm ƀòn dờng Long Xuyên, Củ tịc lơgar ồng Nguyễn Xuân Phúc tus pơrjum dơ̆ mŭt lơh Rơndăp broă bơcri priă tơrbŏ gơl gùng 91 mờ gùng pleh ƀòn dờng Long Xuyên.

Do là broă lơh gùng lòt sơnrờp ngan bơh Ƀộ Giao thông Vận tải geh lơh tàm nam 2022 do. Rơndăp broă bơcri priă lơh gơl gùng tơrbŏ gùng 91 mờ gùng pleh ƀòn dờng Long Xuyên geh să tờm Thủ tướng Cíñ phủ lài do ồng Nguyễn Xuân Phúc kĭ bơcri priă lơh bơh nam 2017, geh bal tàm ală broă lơh bal bơh Rơndăp broă Pơgồp bal tiah rign dà dờng Mekong dê. Rơndăp broă kờp jơh khà priă geh 2 rơbô 100 tơmàn đong, geh bơcri mờ priă càn bơh Ngân hàng Tơnguh bơtàu Câu Á (ADB) mờ dùl bơnah priă càn lài bơh Cíñ phủ lơgar Việt Nam dê, geh Ƀộ Giao thông Vận tải lơh tờm bơcri priă. Do là broă lơh di pal mờ jơnau kơ̆p kờñ 20 nam do bơh làng bol càr An Giang dê. Củ tịc lơgar ồng Nguyễn Xuân Phúc chờ hờp tus pơrjum mŭt lơh mờ kơ̆p kờñ, do là rơndăp broă lơh lam lài bồ nam 2022 nàng bơh tŭ do geh pơn jăt tai pờ ơnàng ală broă bơcri priă rơlao tai bè broă lơh gùng lòt tàm ù gờl, gùng dà lềng, gùng dà dờng tàm càr An Giang mờ tàm tiah ring dà dờng Cử Long, tiah 20 tơlăk nă làng bol mờ geh uă bơta nàng tơnguh bơtàu.

Pơn jăt hơ̆ tàm mho ngai 18/01, Củ tịc lơgar ồng Nguyễn Xuân Phúc tus bal dơ̆ bơyai lơh sơnđờm ai ngui Hìu măy măy kòi Hạnh Phúc tàm ù tiah kơnhoàl Tri Tôn, càr An Giang. Do là hìu măy geh đơs là geh lơh dờng ngan rlau jơh câu Á mờ kờp jơh pràn măy kòi gơ gơs phe geh 1 rbô tấn pah ngai. Củ tịc lơgar ồng Nguyễn Xuân Phúc đơs sùm mờ dùl rài lơh broă sa sươn sre bè lơgar he, broă hòi jà lơh sa mờ măy mok lơh gơlik phan là kờñ ngan nàng lơh gơlik bơta kwơ gơguh tai uă, dong bơtàu tơnguh rài kis bơh cau lơh broă sa dê. Gờm chờ Kông ty Kổ phần Tập đoàn Tân Long sơnđờm ai ngui lơh broă hìu măy măy kòi Hạnh Phúc, ồng Nguyễn Xuân Phúc sồr Kông ty ờ mìng sền gròi tus tàm pơrlòng phan bơna tàm drà tăc mờ lơgar ndai lơm mờ kờñ pal bơh ală anih ơn prăp bơh he dê, pơgồp niam mờ cau lơh broă sa, ờ gŏ di bơcăp giă kòi bơh cau lơh broă sa dê.

Cau mblàng Ndong Brawl-Lơ Mu K' Yến