VOV4.K’ho - Drim òr (21/04), tàm Hà Nội, Củ tịc lơgar ồng Nguyễn Xuân Phúc neh lơh broă mờ Ƀan Thường vụ Mpồl cau chài cah rơña dà lơgar Việt Nam. Củ tịc lơgar pơn jờng, đơs niam Mpồl cau chài cah rơña dà lơgar Việt Nam bè ală cồng nha neh lơh geh, mờ đơs, Đảng, Dà lơgar sùm ai broă sền gròi kwơ màng tus mờ broă bơyai lơh mờ lơh broă bơh mpồl do dê.

                     Củ tịc lơgar ồng Nguyễn Xuân Phúc lơh broă mờ Mpồl cau chài cah rơña Việt Nam

Củ tịc lơgar sồr, Đảng đoàn mờ Ƀan Thường vụ Mpồl cau chài cah rơña dà lơgar VN pal pơn jăt tai sền gròi đơng lam ală kấp mpồl lơh jăt ală gùng dà broă lơh bơh Đảng, bơta tờm là Cỉ thị sồ 56 bơh Ƀộ Cíñ trị, tơnguh gơnoar bơh mpồl cíñ trị lơh broă, gàr niam broă lơh geh cồng nha di jăt mờ kơrnoăt bơh jơnau kờñ. Củ tịc lơgar ồng Nguyễn Xuân Phúc kung sồr Mpồl cau chài cah rơña pơn jăt tai chồl pràn broă lam sồr gùng dà broă lơh bơh Đảng, adăt boh lam bơh dà lơgar ai cau tàm mpồl bal mờ làng bol in, tơnguh jơnau git wă mờ sền kwơ adăt boh lam mờ lơh jăt adăt boh lam.

Cau mblàng Ndong Brawl