Wă rò mờ lơh broă mờ Củ tịc lơgar mờ Mpồl ala măt kwang bàng kâp dờng lơgar Việt Nam dê geh Kwang ătbồ càr Gyeonggi là ồng Kim Dong-yeon mờ ală kwang bàng cribơyai broă mờ lơgar ndai, càr Gyeonggi mờ ƀòn dờng Gwangju. Gyeonggi là càr ơm dơ̆ dùl lơgar Hàn Quôk dê bè khà kờp làng bol, ơm dơ̆ 5 bè bă ù ơnàng. Càr geh 28 ƀòn dờng mờ 3 kơnhoàl; ƀòn dờng tờm là Suwon. Kwơmàng, do kung là ƀòn dơ̆ bàr bơh pơgăp mờr 37 rbô nă cau Việt Nam dê; tàm hơ̆ geh pơgăp 3 rbô nă cau Việt Nam bal mờ rlau 500 hìu bơnhă uă rài kis niam chài Việt Nam mờ Hàn Quôk gam ơm kis tàm ƀòn dờng Gwangju. Tàm dơ̆ lơh broă, Củ tịc lơgar Việt Nam ồng Nguyễn Xuân Phúc sồr kwang đơng lam bồ càr Gyeonggi, ƀòn dờng Gwangju mờ gơnoar ătbồ tiah do sơlơ hòi jà ală mpồl lơh sa kă bro bơh càr dê rề ơnàng broă lơh mờ lơh li la gah broă bơcri priă, kă bro tàm ală tiah bơh lơgar Việt Nam dê, dong kờl tam pà bal bơta mờng chài ai ală tiah tàm lơgar Việt Nam in tàm broă lơh ătbồ làng bol, rơndăp ù tiah bơtàu tơnguh nhơl chờ, sền swì dờp uă rlau cau lơh broă lơgar Việt Nam dê; pơn jăt tai lời uă bơta sền gròi, ai lài bè bơta dong kờl gơwèt mờ mpồl bơtiàn cau Việt Nam tàm tiah do.

Mang ngai 06/12 tơn, Củ tịc lơgar ồng Nguyễn Xuân Phúc mờ Mpồl ala măt Kwang bàng kâp dờng lơgar Việt Nam neh rê bơh càr Gyeonggi, lòt tus ƀlàng rơndeh par ling klàng càr lơgar Seoul, lòt gùng rê hờ lơgar tờm, tơn jơh jơh ală broă lơh tàm dơ̆ lòt còp kâp Dà lơgar tus lơgar Hàn Quôk.