VOV4.K’ho- Drim ngai 03/08, Củ tịc lơgar ồng Nguyễn Xuân Phúc, Kwang ătbồ Mpồl sồr Lơh niam wơl Sền gàr adat boh lam Dà lơgar lòt còp mờ sền swì broă lơh toh glài tơngklàs jàm nam 2022 tàm Hìu jàm Xuân Lộc (gơwèt Kụk C10, Ƀộ Kwang àng) kơnhoàl Xuân Lộc, càr Đồng Nai.

Tàm dơ̆ lơh broă, Củ tịc lơgar ồng Nguyễn Xuân Phúc sồr tàm dùl nhai tus, ală hìu jàm, anih jàm mờ anih bơto tơngkah tề lam cau lơh tìs tàm jơh gùt lơgar kờp sền wơl nàng lơh bè lơi ờ lời hŭi ală cau jàm geh tơl bơta mờ ngan là ờ gŏ di lời gơmŭt ală cau ờ geh tơl bơta, tơl jơnau sồr geh sền swì toh glài tơngklàs jàm dơ̆ do.

Củ tịc lơgar kung sồr Mpồl duh broă Bơto pơlam toh glài tơngklàs jàm lơh jăt niam kơrnoăt boh lam bè toh glài tơngklàs jàm, mờ jơnau sồr là ờ geh gơnoar lời gơlik khăt dùl bơta tìs hŭi lơi halà broă lơh ờ niam lơi, dilah geh jơnau đơs lơi pal sền swì nền nàng ờ lơh gơrềng tus bơta kwơ bơto tơngkah kòn bơnus mờ gùng dà broă lơh dờng do bơh Đảng, Dà lơgar dê. Ală tiah pal rơcăng tơl ală bơta nàng ală cau geh toh glài tơngklàs jàm in rê kis gơrờm bal wơl mờ ƀòn lơgar.

            Cau mblàng Lơ Mu K’Yến