VOV4.K’ho - Di satềp nam pa Ñâm Zần nam 2022, Củ tịc lơgar ồng Nguyễn Xuân Phúc neh lam bồ mpồl kwang bàng lơh broă bơh Đảng, Dà lơgar, Mặt trận Dà lơgar Việt Nam còp, pà phan chờ gờm satềp 55 hìu là ala măt ală hìu geh sră dong kờl bơh dà lơgar, hìu rơƀah, kông ñân kal ke mờ cau gơtìp sơnơm khih Đioxin tàm ƀòn dờng Đà Nẵng.

Củ tịc lơgar ồng Nguyễn Xuân Phúc pà phan, chờ gờm satềp hìu nhă cau geh sră dong kờl bơh dà lơgar, cau gơtìp kal ke tàm ƀòn dờng Đà Nẵng

Tàm dơ̆ tus còp, Củ tịc lơgar ồng Nguyễn Xuân Phúc pà git, di tàm dơ̆ do, Ƀộ Cíñ trị, Đảng dà lơgar, ală anih lơh broă bơh Dà lơgar neh geh cỉ thị đơng lam gờñ ngan tus mờ ală kấp, gơnoar atbồ gùt lơgar, ală anih lơh broă gơrềng bal sền gròi bơsong uă bơta nàng làng bol gùt lơgar wă rò satềp lơngăp lơngai, gơboh gơbài, ală cau, ală hìu ndrờm geh satềp. Jăt jơnau đơs bơh Cíñ phủ, Củ tịc lơgar kung neh kĭ kơrnoăt nè khà priă dong kờl satềp bơh 300 tus 600 rơbô đong ai tơl hìu geh sră dong kờl bơh dà lơgar in. Bơdìh hơ̆ tai, ƀòn dờng Đà Nẵng kung lam sồr mờ tă git nđờ jơ̆t tơmàn đong nàng dong kờl ală hìu gơtìp rơƀah.

Cau mblàng Ndong Brawl