VOV4.K’ho - Di satềp Trung thu, Củ tịc lơgar ồng Nguyễn Xuân Phúc pơyoa sră chờ gờm tus ală kơnòm pa tào, kơnòm dềt. Tàm pang sră, Củ tịc lơgar pơyoa jơnau chờ gờm satềp tus mờ gùt kơnòm dềt lơgar Việt Nam satềp Trung thu hờm ram bal mờ ală cau pròc mhàm, tam pà bal nùs nhơm kờñ gơboh mờ ală kơnòm dềt gơtìp ờ bơtoah tàm rài kis ờ geh dờp dùl satềp Trung thu di pal mờ tơl ală bơta.

                              Củ tịc lơgar ồng Nguyễn Xuân Phúc pà phan kơnòm dềt in

Củ tịc lơgar tơlik nùs nhơm kơ̆p kờñ, kơnòm pa tào, kơnòm dềt gùt lơgar sùm geh nùs nhơm niam, lơh ngan sơrlèt mờ kal ke, brồ guh tàm broă bơsram sră mờ tàm rài kis. Mờ sồr tơl hìu, ală kấp, ală gah lơh broă bal mờ gùt mpồl bơtiàn, mờ kơnòl, nùs nhơm kờñ gơboh pal pơn jăt tai geh uă broă lơh mùl màl rơlao tai, drơng gàr ală kơnòm pa tào, kơnòm dềt tàm ngai satềp Trung thu in, tàm hơ̆ uă ngan là gơwèt mờ ală kơnòm dềt kòn đời, ală kơnòm dềt geh rài kis gơtìp kal ke, ală kơnòm dềt kis tàm tiah sar lơgar ngài, tiah nhàr dà lơgar, tiah bồt dà lềng nàng jơh ală kơnòm dềt ndrờm geh sền gròi tơnguh bơtàu tơl ală bơta, geh kis tàm nùs nhơm kờñ gơboh, tiah kis niam ờ do ờ dă.

Cau mblàng Ndong Brawl