VOV4.K’ho- Mho ngai 21/09, tàm Hìu lơh broă Củ tịc, Củ tịc lơgar ồng Nguyễn Xuân Phúc neh geh dơ̆ tìp mat 45 nă cau ala mat cau pơn rơ jak là đảng viên, cau geh bơngă pin dờn ala mat làng bol kòn cau bơh rlau 20 jơi bơtiàn kòn cau kis tàm càr Cao Bằng.

\

Củ tịc lơgar ồng Nguyễn Xuân Phúc tìp mat ală cau ala mat pơn rơ jak làng bol kòn cau càr Cao Bằng

Đơs tàm dơ̆ tìp mat, Củ tịc lơgar đơs sùm, do là ală bơta tờm geh gơnoar broă dờng màng tàm broă bơt bơtàu ală anih lơh broă cíñ trị tàm ƀòn lơgar, sền gàr lơngap lơngai, rơndap tap sèng, sơlơ tơnguh mpồl tam klăc dờng jơi bơtiàn kòn cau, sền gàr bơhiàn niam bơnĕ bơta niam chài ală jơi bơtiàn kòn cau dê, là rbàng tàm tơrbŏ đah gơnoar atbồ mờ làng bol. Tơngai tus, Củ tịc lơgar kơ̆p kờñ Đảng ƀộ, gơnoar atbồ mờ ală cau ala mat làng bol jơi bơtiàn kòn cau pơn rơ jak càr Cao Bằng pơn jat tai lơh jat kơnòl broă tơrmù rƀah. Nàng tiah kơh bơnơm bơtàu tơnguh ndrờm bal mờ tiah ring, ală cau ala mat pơn rơ jak làng bol kòn cau càr Cao Bằng lơh jat niam bơhiàn ờs mờng ƀòn lơgar kăc màng, là ală krơh àng, kơ̆ dơn lơh gơ rề uă nùs nhơm tam klăc bal, nùs nhơm lơh ngan jơh nùs tàm rài kis, tă pơgồp tàm broă bơt bơtàu ƀòn lơgar bơh dà lơgar dê.

Cau mblàng K’Hạnh