VOV4.K’ho- Ngai 28/9, Củ tịc lơgar ồng Nguyễn Xuân Phúc tìp mat Bơtau lơgar Nhờk ồng Naruhito di dơ̆ lòt ies, tơp ƀồc kâp dà lơgar Thủ tướng Nhờk lài do ồng Shinzo Abe, cau bơyô rềp mềr ngan bơh dà lơgar mờ làng bol Việt Nam dê tàm Tokyo, lơgar Nhờk.

Tàm dơ̆ tìp mat, Củ tịc lơgar ồng Nguyễn Xuân Phúc pơyua jơnau tam pà moat jrùm tềng đap bơta sang rài nisơna bơh Thủ tướng lài do ồng Shinzo Abe dê; đơs nền ală nùs nhơm kuơmàng mờ bơta jơh nùs, bơta lơh ngan tơnguh git gơp lơh broă bal, lơh bơyô bal Việt Nam mờ Nhờk ngai sơlơ bơtàu tơnguh pràn kơldang, pơn rơ ngan là broă tơnguh tus git gơp lơh broă bal jŏ jòng jrô ơnàng tài ring lơngai mờ pas sơm tàm câu Á nam 2014, là ală phan lời wơl kuơmàng ngan pal geh 2 lơgar sền gàr mờ ngui niam. Bơtau lơgar Nhờk đơs là, broă sơlơ tơnguh bơta pin dờn mờ git wă bal mờ gơp đah làng bol 2 lơgar bơh ală broă lơh tìp mat niam chài, lơh kwèng làng bol, ngan là tàm nam tơngkah kir sơnrai 50 nam ngai lơh git gơp cribơyai broă Việt Nam- Nhờk, geh gơtha kuơmàng ngan gơ wèt mờ bơta bơtàu tơnguh git gơp 2 lơgar dê.

VOV.vn- Cau mblàng K’Duẩn