VOV4.K’ho- Ngai 12/05, Củ tịc lơgar ồng Nguyễn Xuân Phúc mờ ală Kwang bàng Quôk hội mpồl tĕ khà sồ 03 ƀòn dờng Hồ Chí Minh neh tìp măt mờ cau tĕ khà ală quận: 5, 8 mờ 11. Cau tĕ khà ală quận cih dờp bơta lơh ngan bơh Đảng, Dà lơgar mờ gơnoar ătbồ ƀòn dờng dê tàm broă lơh rơcăng sơndră kòp Kovid-19, lơh jăt ală broă lơh dong kờl ờdo ờdă rài kis mpồl bơtiàn nàng làng bol in kơ̆ kơl jăp rài kis.

Củ tịc lơgar đềt mềr ngan tơm bơh bơr mờ ală cau tĕ khà

Ală cau tĕ khà là cau Lo, cau Prum tàm ù tiah ală quận do pà gĭt, tơngai do, gơnoar ătbồ neh geh uă broă lơh dong kờl sền gròi mpồl bơtiàn cau Lo, tàm hơ̆ sền gròi tus anih ơm, hòi jà oh kòn là hìu bơnhă cau Lo lòt bơsram sră...Ală cau tĕ khà kơ̆p kờñ geh tai uă hìu bơsram bơto dà Lo ai oh kòn hìu bơnhă cau Lo in; ai tơl bơta, sền gròi dong kờl ai làng bol kòn cau Prum in, ngan là cau ùr, oh kòn hìu bơnhă cau kòn cau mờ kơ̆p kờñ geh Kwang bàng Quôk hội ala măt ai cau tĕ khà kòn cau Prum in...

Cau mblàng Lơ Mu K’Yến