Đơs tàm dơ̆ tìp măt, Củ tịc lơgar ồng Nguyễn Xuân Phúc đơs là, kờñ broă lơh rơcăng sơndră sa kwề sa kwà lơh geh cồng nha uă, pal lơh pràn rơcăng kơryan lài lài mờ tŭ dră. Jăt Củ tịc lơgar, broă lơh rơcăng sơndră sa kwề sa kwà tơngai do geh Đảng, Dà lơgar mờ ală kâp, ală ngàñ, ală tiah sùm sền gròi mờ lơh niam ngan, lơh geh ală cồng nha niam. Củ tịc lơgar ồng Nguyễn Xuân Phúc đơs là, ƀòn dờng Hồ Chí Minh là tiah drà dờng, gal làng bol den tàng gam dùl bơnah cau rƀah, ờ hềt tơl ngui tơl sa tàm rài kis. Den tàng bè hơ̆, Củ tịc lơgar sồr gơnoar ătbồ ƀòn dờng Hồ Chí Minh sền gròi rlau, geh uă broă lơh dong kờl rlau gơwèt mờ cau rƀah. Pal ngui niam ală broă lơh pơnrơ tàm broă lơh rơcăng gàr rài kis ai cau rƀah in, làng bol jăt yàng in jăt nùs nhơm ờ lời cau lơi gơtìp sơrbì lời ơm wơl hờ ngkời.