VOV4.K’ho- Dờp jơnau jà bơh Củ tịc lơgar ồng Nguyễn Xuân Phúc, Kwang atbồ lơgar Singapore mò Halimah Yacob bal mờ bơklau lam bồ mpồl kwang bàng kấp dờng lơgar Singapore còp kấp Dà lơgar tus lơgar Việt Nam bơh ngai 16 tus ngai 20/10/2022. Drim ngai 17/10/2022, dơ̆ wă ngan ngồn neh geh bơyai lơh yŭ rơyùm tàm Hìu lơh broă Củ tịc. Tơnơ̆ dơ̆ wă tơn, Củ tịc lơgar ồng Nguyễn Xuân Phúc neh cribơyai mờ Kwang atbồ lơgar Singapore.

Bàr nă kwang đơng lam bồ sền dơ̆ kĭ hơ, jàu bàr pe sră nggal lơh broă bal đah 2 lơgar dê

Tàm dơ̆ cribơyai, bơyai bè bàr pe broă lơh lơh broă bal dờng tàm tơngai tus, 2 gah ring bal pơn jat tai sơlơ tơnguh tàm pơgơl mpồl kwang bàng kấp dờng mờ gàr niam cồng nha ală broă lơh lơh broă bal tờm ngan tàm ală gah Đảng, Dà lơgar, Cíñ phủ, Quôk hội mờ tìp mat lơh kuèng làng bol, lơh broă bal mpồl lơh sa kă bro. Củ tịc lơgar sồr lơgar Singapore lơh geh ală bơta ƀuơn pờ mpồng rlau tai ai phan bơna Việt Nam in bè phan lơh geh bơh broă lơh sa suơn sre, phan tàm dà, tàñ mai, phan ngui sa lơh gơlik.... geh tăc tàm drà kă bro lơgar Singapore dê; dong Việt Nam tus bal uă rlau tai tàm ală drà tăc bro phan gùt plai ù. Cribơyai bè ală bơta tàm tiah do mờ tàm dunia, 2 nă kwang đơng lam bồ đơs nền tai nùs nhơm ờ tŭ lơi tam gơl bơh ASEAN bè dà lềng tiah đah mat tơngai lik mờ bơta kwơ màng bơh broă gàr niam sùm bơta ring lơngai, sền gàr lơngap lơngai, kơ̆ kơljap, lơngap lơngai, khat gơboh gùng dà lềng mờ gùng rơndeh par; bơsong ring lơngai ală bơta tam pìt tàm phà, di pal mờ adat boh lam dunia dê, tàm hơ̆ geh Kông ước Liên hợp quôk bè Adat dà lềng (UNCLOS) nam 1982.

VOV/ K’Hạnh mblàng