Ala mat kwang đơng lam bồ Đảng, dà lơgar, Củ tịc lơgar ồng Nguyễn Xuân Phúc pơyua jơnau lùp còp đềt mềr, jơnau nting bơr sa tềp niam ngan rlau jơh tus ală kwang bàng, ală kwang đơng lam bồ, lài do là kwang đơng lam bồ kâp dờng tiah tàm gùl lơgar, ù tiah bềng bơhiàn kac màng, geh uă tă pơgồp dờng màng tàm broă lơh bơt bơtàu mờ sền gàr dà lơgar.

Củ tịc lơgar pà git, nam lài, tềng đap bơta đơng lam bồ bơh Đảng dê, bơta rơcang lài jơh nùs, lòt bal, pơgồp bal jơh nùs mờ ală anih lơh broă kuơmàng tàm anih lơh broă cíñ trị, gùt lơgar neh lơh geh uă cồng nha niam tàm jơh ală gah lơh sa mpồl bơtiàn, sền gàr dà lơgar, sền gàr lơngăp lơngai mờ cribơyai mờ lơgar ndai. Tàm hơ̆, lơh sa gơguh jơnhua, geh 8,02%. Lơh sa dờng kơ̆ kơljap, uă bơta tàm pơnring dờng geh gàr niam. Mờ jơnau đơs ờ lời cau lơi gơtìp lời wơl hờ ngkời, broă lơh gàr niam rài kis mpồl bơtiàn geh lơh niam neh dong kờl cau ngui cau lơh broă mờ rlau 68 tơlak dơ̆ cau lơh broă mờ kờp jơh priă tă lơh rlau 104 rbô tơmàn đông.