VOV4.K’ho - Pơn jăt tai broă pơrjum dơ̆ 3, Quốk hội khoă 15, ngai òr (25/05), cri bơyai tàm mpồl bè broă lơh sa mpồl bơtiàn mờ kes priă dà lơgar ală nhai bồ nam 2022, ală kwang bàng đơs niam ală broă lơh ngan bơh Cíñ phủ nàng brồ guh wơl broă lơh sa tàm tơngai do.

Geh uă kwang bàng ring bal mờ jơnau yal bơh Cíñ phủ yal Quốk hội, cồng nha do là tơrgùm bơh ală broă lơh ngan pràn kơl dang, ờ ngòt glar bòl tàm tơngai do. GDP quý I nam do kờp dŭ gơguh 5,03%, lơh sa dờng ring niam, ală gah lơh broă gam gơguh wơl. Mơya, ală kwang bàng ờ sŭk tŭ khà priă jờu gơguh lơh gơrềng ờ niam tus mờ khà priă phan kă bro, phan lơh broă, khà priă pơn diang. Di lah ờ sền gròi niam khà priă xăng jờu den lơh gơguh khà priă tus mờ ală bơta phan kă bro ndai. Tàm mpồl cri bơyai, Củ tịc lơgar ồng Nguyễn Xuân Phúc đơs tờm bơh kwang đơng lam ha là kwang bàng Quốk hội bañ sền ờ sơ̆p, hưh nùs mờ ală cồng nha neh geh lơh lài ngan, tài tềng đăp măt gam uă ngan kal ke. Pal kah bơnah priă hòi jà lơh sa, bơcri priă dà lơgar pal geh chồl pràn niam rơlao tai, mŭt tàm rài kis nàng di tŭ dong kờl làng bol, mpồl lơh sa kă bro bè gùng dà broă lơh bơh Đảng, Dà lơgar. Củ tịc lơgar ồng Nguyễn Xuân Phúc đơs tus tơngu me bơh dùl jơnau cih ƀăo là “Bañ lời gơmù khà priă lơh ờ niam tus mờ rài kis cau rơƀah”.

Cau mblàng Ndong Brawl