VOV4.K’ho- Drim ngai 19/05, tàm Hìu duh broă Ƀộ Quôk phòng dê, Củ tịc lơgar ồng Nguyễn Xuân Phúc tus bal Dơ̆ bơyai lơh jàu Khà jờng Hồ Chí Minh bè jak chài, măy mok gah broă lơh ling klàng mờ sền gàr dà lơgar. Ala mat kwang bàng đơng lam bồ Đảng, Dà lơgar, Củ tịc lơgar ồng Nguyễn Xuân Phúc jàu Sră cơng tàng Khà jờng ai ală cau jak chài in là cau lơh bal bơh ală broă lơh jak chài dê geh chờ hờp jàu khà jờng.

Củ tịc lơgar ồng Nguyễn Xuân Phúc đơs sùm, bàr broă lơh tàm gah broă lơh ling klàng, sền gàr dà lơgar bơh 49 nă cau lơh bal dê geh jàu Khà jờng Hồ Chí Minh dơ̆ do geh bơta kwơ dờng màng dờng ngan, là cồng nha bơh bơta roh uă dà kơlhề tŭ tơngai kơlôi sơnơng, tă pơgồp bồ tơngoh jak mờ broă lơh jak chài bơh ală cau jak chài broă ling klàng dê. Bàr broă lơh gơwèt gah broă lơh ling klàng, sền gàr dà lơgar bơh Tập đoàn Kông nghiệp- Viễn thông ling klàng dê geh lơh bơh mpồl kwang bàng cau jak chài bơh tập đoàn dê bal mờ uă kwang bàng kơnòm să, geh bơto jrô ngan bal mờ bơta sền gròi bơh kwang đơng lam bồ dê, sồr lơh kràñ cê jơh nùs mờ geh cồng nha bơh Quân ủy Dà lơgar, Ƀộ Quôk phòng dê, bơta dong kờl bơh ală anih lơh broă, mpồl lơh broă tàm mpồl ling klàng dê.

Cau mblàng Lơ Mu K’Yến