VOV4.K’ho- Mang ngai 19/08, Đảng ƀộ mờ làng bol kơnhoàl Quế Sơn, càr Quảng Nam yŭ rơyùm bơyai lơh Dơ̆ bơyai lơh tơngkah kir sơnrai 50 nam Tam lơh pha lin Cấm Dơi. Tus bal dơ̆ bơyai lơh do geh Củ tịc lơgar ồng Nguyễn Xuân Phúc, kwang đơng lam bồ càr Quảng Nam, quân khu 5, kơnhoàl Quế Sơn, ală Mè Việt Nam khin cha jak chài, Cau khin cha jak chài mpồl ling klàng phàu crong làng bol, ală kwang ling, cau ling yau, ală hìu bơnhă geh màng mờ kăc màng, gal ngan làng bol kơnhoàl Quế Sơn.

Củ tịc lơgar ồng Nguyễn Xuân Phúc bal mờ mpồl lơh broă chu ñàng, pơdơng bơkàu tàm Hìu duh kah Cau ling chơ̆t màng kơnhoàl Quế Sơn

Pơgăp mờ do 50 nam, bal mờ nùs nhơm guh ntàu tam lơh bơh ling klàng mờ làng bol tiah đah jum dà lơgar dê, bơh bơta đơng lam bồ bơh Đảng dê mờ să tờm tơn là Khu ủy khu 5 mờ Tỉñ ủy Quảng Nam, mpồl ling phàu crong khu 5 mờ mpồl ling phàu crong tiah do neh dùl nùs bal mờ kwang bàng, cau ling Sư đoàn 711, Tiểu đoàn bơh Quân khu 5 dê, khin cha jak chài, lơh gơs bơta tam lơh jai pha pơnrơ ngan- guh ntàu tam lơh gơ sơ̆t chơ̆t jơh ală pôs đồng Cấm Dơi, tơngklàs kơnhoàl Quế Sơn, pơgồp bơnah wèt tus tơngklàs càr Quảng Nam.

Đòm jăt bơhiàn khin cha kơ̆ dơn, ờ tŭ lơi dơrcul nùs tàm dơ̆ tam lơh mờ bol sò tơm bơh lơgar ndai tus sơgràm phà dà lơgar, ală nam do, Đảng ƀộ kơnhoàl Quế Sơn neh đơng lam làng bol lơh geh uă cồng nha kwơmàng. Khà gơguh lơh sa uă mờ kơ̆ kơl jăp, rơndăp tăp sèng lơh sa geh ntrờn jăt gùng dà niam ngan.

Cau mblàng Lơ Mu K’Yến