VOV4.K’ho- Drim ngai 28/8, tàm ƀòn dờng Sầm Sơn, càr Thanh Hóa, Củ tịc lơgar ồng Nguyễn Xuân Phúc tus bal dơ̆ sơn đờm lam lơh Tiah kah kir làng bol, kwang bàng, cau ling mờ kơnòm bơsram tiah đah jum dà lơgar tơrgùm lơh kơnòl broă tàm tiah đah tô dà lơgar; Dơ̆ yal kơrnuat bơh Thủ tướng Cíñ phủ dê dờp ƀòn dờng Sầm Sơn lơh gơs kơnòl broă bơt bơtàu ƀòn lơgar pa; dơ̆ dờp Huân cương Lơh broă khà 3 bơh Củ tịc lơgar dê.

 Jat jơnau yal tàm dơ̆ bơyai lơh, bơh nggùl nhai 10 nam 1954 tus nhai 5 nam 1955, tàm xã Quảng Tiến, tŭ do là sơnah ƀòn Quảng Tiến, ƀòn dờng Sầm Sơn, càr Thanh Hóa geh pin dờn jàu wă rò rlau 47 rbô 300 nă kwang bàng, mờr 7 rbô 500 nă kơnòm bơsram, cau bơsram dờng mờ hìu bơnhă kwang bàng bơh tàm tiah đah jum dà lơgar lòt tơrgùm lơh kơnòl broă. Tŭ do, jat bơta kơp kờñ bơh ală kwang bàng, cau ling, kơnòm bơsram lài do tơrgùm lơh kơnòl broă dê, càr Thanh Hóa jàu ai ƀòn dờng Sầm Sơn in rơndap ai ù nàng lơh rơndap broă lơh Tiah kah kir làng bol, kwang bàng, cau ling mờ kơnòm bơsram tiah đah jum dà lơgar tơrgùm lơh kơnòl broă tàm tiah đah tô dà lơgar.

Đơs tàm dơ̆ bơyai lơh, Củ tịc lơgar ồng Nguyễn Xuân Phúc đơs niam càr Thanh Hóa, ƀòn dờng Sầm Sơn neh geh bơta rơcang lài niam ngan rlau jơh ai broă sơn đờm lam lơh rơndap broă lơh Tiah kah kir làng bol, kwang bàng, cau ling mờ kơnòm bơsram tiah đah jum dà lơgar tơrgùm lơh kơnòl broă tàm tiah đah tô dà lơgar, mờ kung sồr lam lơh di tŭ tơngai hơ pơrgon nàng ai ngui di tơngkah kir sơnrai 70 nam ngai làng bol, kwang bàng, cau ling, kơnòm bơsram tàm tiah đah jum dà lơgar tơrgùm lòt lơh kơnòl broă tàm tiah đah tô dà lơgar.

Cau mblàng K’Duẩn